Menu
cache/resized/63614fa437cb694b8770470f544a87ea.jpg
“TOURS & TRAVEL AT IT’S BEST IS ...
cache/resized/de22811ba69e150b74276adfe9cd60f1.jpg
S&F Brothers (Car Dealer & Accounting ...
cache/resized/c5486089fb6fe141100fa93741aee80f.jpg
Vaiola Shop & Cafe  
cache/resized/952d37c5b239f200e4b0a944bfa8cde0.jpg
RED Rapid Engineering Diagnostic Specialize in: ...
Latest News

Taumalesia, Taumaleula Featured

Pilinisesi Sinaitakala Tuku'aho Pilinisesi Sinaitakala Tuku'aho

AATI & LITILESĀ / ART & LITERATURE
TA‘ANGA/MAAU & HIVA / POETRY & MUSIC

Taumalesia, Taumaleula

(Ko e ta‘anga hiva/langi tau‘olunga)

Fatu ‘e Maeapalaivai (Siale Lātū)

Te u hūfanga ‘i he talamalu ē fonua
Ka e ‘atā ange mu‘a ke u takimamata
Ki he Ī-O-Lupea mo e Funga Tolopona
Lata‘anga ia ‘o e folau ‘eve‘eva

Ke me‘ite ā si‘i ‘Otu Langi ‘o Mu‘a na
Ka u fakalelulelu ‘a si‘ono Leimapa
‘Oku lata he toli ‘i he Kolokakala
He ko e Tavakeoma ‘o e Ongo Ha‘angana

Sinaitakala ta‘ahine ‘o Olotele
‘Oku fihi ai e ve‘eve‘e
Tangane ko e tama mei Loto Pelehake
‘Oku manuinui ‘i he Fau Taupe

Tau: Taumalesia, Taumaleula
‘O fatu‘a ‘i he Funga Fāua
Kasa hulu ē ‘o Siumafua‘uta
Vakauho 'ena mo Loto Kolomotu‘a

Ko e ki‘i fakamatala nounou

Na‘e fatu ‘e Maeapalaivai ko e matāpule mo e punake ‘a e Tama Tu‘ipelehake ‘a e ta‘anga hiva mālie fau mo loloto atu ni ko e “Taumalesia, Taumaleua” ko e langi tau‘olunga ‘o Sinaitakala Fakafanua, ‘o to e ‘iloa ko Sinaitakala Tuku‘aho ko e Pilinisesi Kalauni lotolotonga ‘o Tonga. ‘Oku ngāue‘aki lelei ‘e he punake ‘a e fa‘ahinga lalahi ‘e tolu ‘o e heliaki ko e heliaki mohu mo fonu hono hohoko fihitu‘u, ‘a kau ai ‘a Lapaha, Pelehake, Kolomotu‘a mo Ma‘ofanga. ‘Oku ‘uhinga ‘a e taumalesia mo e taumaleuala ki he ongo toka‘anga matangi ‘o Ma‘ofanga ka e tefito ki Popua ‘oku tu‘u ai ‘a e ‘Otusia Tekiteki, ‘o hangē ko e Sia Matangi, Sia Matamoana, Sia Maka mo e Sia Hake. ‘Oku kamata pē hono fakatautau ‘a e langi he ngaahi kupu mo fakatau ki he tau, ‘o tatau pē ‘a e ta‘anga/maau, fasi/afo moe haka.

 

3 comments

  • Uatesoni Latu
    Uatesoni Latu Wednesday, 02 August 2017 18:56 Comment Link

    Ki'i fakatonutonu atu pe e kupu 2 moe 3
    2.Ke me'ite a si'i 'out langi 'o Mu'a na
    Kau fakalelulelu ai 'a si'ono leimapa
    'Oku toka ai e manongi e Kolokakala
    He koe tavake oma 'oe ongo Ha'angana

    3.Sinaitakala Ta'ahine 'o 'Olotele
    'Oku fihiaki ai e ve'eve'e
    Tangane koe Mapa meu loto Pelehake
    'Oku manuinaui ai e Tokaukalupe.

    malo 'ofa atu.

    Report
  • Faua
    Faua Thursday, 20 July 2017 15:17 Comment Link

    Tue tue tue....K o e Funga Faua ia mo hono tala pea fakamalo lahi atu hono toutou 'omai e ngaahi ta;anga malie ni ketau ako mei ai.

    Report
  • Timothy GuilLaume
    Timothy GuilLaume Wednesday, 19 July 2017 12:16 Comment Link

    Malie lahi koe fa'u ni 'oku ha 'ihe tohi hiva 'a Kik Velt koe fa'u 'e he tokotaha kehe ka 'oku ou fakamalo atu 'i hono 'omai 'oe tokotaha totonu na'a ne fa'u e hiva ni pea koe mo'oni ia koe fa'u 'a Maeapala'ivai kihe mokopuna 'o e Tu'ifaleua ko Sinaitakala 'ihe katoanga'i hokosia hono ta'u taha. Malo

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top