Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Loka Siliva Featured

Loka Siliva

AATI & LITILESĀ/ART & LITERATURE
TA‘ANGA/MAAU & HIVA/POETRY & MUSIC

Loka Siliva: Maa'imoa 'a Kuini Sālote Tupou III

Loka Siliva

He Māhina si'ene halani
Huelo ha 'i he loto tahi
Langa noa hoku 'atamai
Manatu 'o fakatupu tangi

Tau
'Amusia pē 'a e matangi na
'Oku ne angi fa'iteliha
Kae hopoate pē kita
He 'ofá 'oku loka siliva

'Uisa he fāhiná 'ene hopo
He fihinga maile laumomo
Ko hoto kahoa tuku 'i loto
Teu tauleva 'o 'ikai ke to'o

Si'i lose he taukakapa
'Oku fotu he ngoue kakala
'Oku hā he seití ne tapa
Ho 'īmisi koulá tokotaha

Fakamatala Nounou:

Ko e fatu ta'anga foki 'oku mahino koe 'uhinga pe 'a e punake 'oku 'a'ana 'a e ta'anga koia pe 'e pule pea koe maa'imoa ko'eni 'oku mahino 'oku 'ikai ha toe 'ilo lahi ki hono 'uhinga ka koe Ta'ahine Kuini pe.

'Oku lahi pe 'a e ngaahi faka'uhinga ki he maa'imoa ko'eni ka 'oku 'i ai foki mo e faka'uhinga koe fatu 'eni ki he 'ofa'anga 'o e Ta'ahine Kuini ka ko hono husepaniti 'ofeina Tama ko Pilinisi Tungi Mailefihi. Na'e pekia foki 'a e tama 'oku kei tu'u ho'ata 'a e la'a (ta'u 53) pea na'e kei 'eiki si'i pe foki mo e Ta'ahine (ta'u 41) 'i he taimi na'e pekia ai 'a Tungi.

'Oku fakatatau 'i he maa'imoa ni 'a Pilinisi Tungi Mailefihi ki he ngaahi naunau masani 'o natula 'o hange ko e mahina pea mo e ngaahi kakala hingoa 'o e  fonua 'o hange koe fāhina mo e lose koe kakala 'ilo fakavaha'a-Pule'anga foki ia.

Na'e fakamahino 'e he maa'imoa ni 'oku 'ikai ha toe me'a tene fakauoua'i 'a e 'ofa 'a e Ta'ahine Kuini ki hono husepaniti Tama ko Pilinisi Tungi neongo 'ene pekia  pea'oku hange ha loka siliva 'o malohi mo faingata'a ke veteki 'a e 'ofa koia "He 'ofá 'oku loka siliva".

Leave a comment

Make sure you enter all the required information, indicated by an asterisk (*). HTML code is not allowed.

back to top