'Ofa Vivili Featured
Heilala
‘AATI & LITILESĀ/ART & LITERATURE
TA‘ANGA/MAAU & HIVA/POETRY & MUSIC
"'Ofa Vivili" Fatu 'a Pilinisesi Melenaite Tuku'aho
1. Uisa e ta ko e me’a’oku vivili
‘Oka feliuekina si’ete ‘amanaki
Ki he kakala mo’oni na’a te fili
Ko si’oto teunga ki he nofo taimi
2. Faka’amu ‘e hoku loto ‘o fakahahano
Ki he tulimafua taumama’o
Fekita mo e ‘atamai ta’emanofo
Vaikau’aki si’ete ‘ofa loto
Tau
Auē teu ‘auhia ‘i ho’o manatu
Mānoa ‘i he vavā he langi lau
Ka kuo hūmataniu ‘iate au
Kaveinga ‘o e ‘ofa ni kuo pau
2 comments
-
Malo Palofesa e vahevahe malie pea ko 'eki ma'u vaivai koe ta'anga 'eni 'a Melenaite hange ha'a ne hahanu ki ha 'amanaki na'e to noa. 'Oku 'i ai pe foki e faka'uhinga pea tulou atu ki loto tatau koe fatu 'eni kia Taufa'ahau 'a ia na'e Tupou hono IV. Koe fatu 'eni 'oku malie hono fasi pea mali hono lea 'o ifo pea vovo.
-
Tulou kae fai atu ha ki'i fietautau mo fiema'uma'u kihe fofonga'i ta'anga malie fau kuo fai hono hikitatau, 'aia 'oku hoko 'ae mohu mo fonu hono fuo moe uho koe faka'ofo'ofa mo fakamafana mei he heliaki hono lea, 'o hohoatatau/hohoamalie moe tu'akauta hono afo.
'Oku hoko 'ae ta'anga hiva kakala malie fau ni koe fakamo'oni kihe loloto, ma'olunga moe maokupu makehe 'oe fifili 'ae ha'a punake 'o Tonga kihe 'atamai (mind) moe fakakaukau (thinking) 'oku tefito he 'uto (brain) moe ongo (feeling) moe loto (desire) 'oku makatu'unga he fatu/mafu (heart) -- 'aia 'e hoko koe ma'unga 'ilo (knowledge) moe poto (skill) 'e ala ma'u tokoni lahi mei ai 'ae saienisi 'oe 'atamai moe fakakaukau (psychology) moe saienisi 'oe ongo moe loto (psychiatry).
'E lava ke lau koe kau punake koe kau saienitisi/palofesa 'oe psychology moe psychiatry moe kau saienitisi/palofesa 'oe ngaahi 'univesiti koe kau punake 'oe 'atamai-fakakaukau moe ongo-loto. 'Oku te'eki ai foki ha 'ilo (moe poto) lahi 'ae kau saienitisi/palofesa 'oe psychology moe psychiatry kihe ngaahi ta'anga malie atu mo fihi fau 'ae kau punake he 'atamai-fakakaukau moe ongo-loto!