“ Si'oto'ofa Talamatangi:
Malo fau hono ke i 'aofia mai hotau pola pea kataki 'ala he ngali lolongo 'a e ha'ofanga ka na'e fai 'a e ki'i tulekava pea ko e toki ake hake 'eni ke fai ha tulituli talanga. Malie atu 'a e fifili mo e tanaki ma'uhinga mo 'aonga kuo ke feia, pea ko e 'uhinga tefito ia 'a e fokotu'u kaveinga mo langa talanoa he faiva ta'anga / faiva maau ke ne fakatupu ha fakakaukau hono filihi mo fokihi 'a e loloto mo e maokupu 'o e ngaue 'a ha'a ta'anga he faiva fa'u mo ha'a maau he faiva lau, 'o kai-mo-inu hotau laumalie he'enau tatau, potupotutatau mo e malie mo pao-mo-toloaki kinautolu ko e to'ongapo mo e tukutukulaumea 'a e kuohili/kuohoko 'i mu'a he lotolotonga mo e kaha'u / kahoko 'i mui he lotolotonga ma'ae vaa'ikuonga mo ngaahi to'utangata.
'Oku mo'oni ho'o tokanga'i 'o e lave 'a e fua kohi / laini kotoa 'o e ngaahi kupu / veesi [1-3] kotoa ki he ngaahi "toka'anga matangi," 'o hange ko e: "Angiangi mai 'a e Funga Siu-Malaki" [kohi 1, kupu 1]; "Angi taulua 'a e tonga hihifo" [kohi 1, kupu 2]; mo e: "Ne sikahema ma'ili 'o ne angiangi." 'Oku 'uhinga 'a e kohi 1, kupu 1 ["Angiangi mai 'a e Funga Siu-Malaki"], ki he hake / fa'aki mai 'a e matangi he funga 'ana ko Siu-Malaki 'i Fahefa he tu'aliku 'o Houna-'Utulau mo e Liku 'o Hihifo.
['Oku pehe na'e fua fanongo 'a e punake he ongona mai 'a e ongoongo ki he ha'ele 'a Kuini Salote ki Pilitania ki he hilifaki kalauni 'o Kuini 'Ilsapesi lotolotonga 'ene faka'uli mai he motololi 'i Fahefa, 'o tupu / ake ai e 'anau 'a e punake ke heka atu he matangi hihifo 'ene ake mo fa'aki mai he funga 'ana Siu-Malaki 'ene popoaki tu'a'ofa ki he Lupe 'o e 'Otu Tonga Ta'ahine Kuini 'Ofeina ko Salote].
'Oku 'uhinga 'a e kohi 1, kupu 2 ["Angi taulua 'a e tonga hihifo"], ki he angi feliuekina 'a e matangi, 'o lotolotonga 'ene angi mei he kuo liliu / mafuli ia 'o angi mei he [angi taulua, 'a ko e lea "lua" ko e mu'aki lea ia ki he "ua"], 'a ia ka angi matangi mei he, pea 'ohovale pe ia kuo to e angai ia 'o tokai mei he [taulua e matangi] mo e ha fua. 'Oku hange 'eni ha heliaki 'a e punake ki he ta'e'alo'aloa 'a e kau atu si'i Tonga fonua vaivai mo masiva ['Otu Feleniti / Felenite] he pue 'o e katoanga tala mo kinokinoifia 'o e hilifaki kalauni 'o e Tu'i ko Kuini 'Ilisapesi 'o e Pule'anga Hau 'o Pilitania / Polata'ane. 'Oku to e fao'i 'e he punake 'a e 'uhinga ni he kohi 1, kupu 3 ["Ne sikahema ma'ili 'o ne angiangi"], 'o ngali ko e heliaki ki he fetaulaki he Palasi Pakinihami 'a e ongo Tu'i 'o Feleniti / Felenite mo Pilitaina / Polata'ane, 'a ia 'oku hohoatatau fakatouloua hona 'uhinga, ngeia mo e langulangia, 'o Kuini e 'a e Pule'anga Hau ko Tonga ka e Kuini e 'o e Pule'anga Hau ko Pilitania mo e ha fua.
Te u ki'i koma si'i he ka e tokonaki mo fakatau mai mu'a ha'atau kava ka tau toki hoko atu.
'Ofa ongo mo e manatu loto,
Hufanga ”