“ 'Oku ma'u mo lau koe fakafatu/ fakafa'u hono ta'anga 'oe ta'anga hiva malie koe "Lovely Hula Girl" 'e Siale Seni mo fakafasi/ fakaafo hono hiva 'e Pila Wolfgram koe ongo to'a 'atisi musika 'iloa mo manakoa mo'oni ('o kau ai moe toe ongo to'a 'atisi musika ko Pila Sevesi mo Sione 'Aleki) 'o Tonga kuo nau 'osi si'i folau-hola (pekia) kotoa kihe Mamani-'oe-fakangalo (Pulotu) kae kei ongona mai honau hikuhikule'o he vaha'a-kuonga 'i Maama.
'Oku malie lahi hono fakataha'i he ta'anga mo e hiva 'a e ta'anga-hiva "Lovely Hula Girl" (moe ngaahi ta'anga-hiva lahi kehe pe) 'ae ngaahi founga/ akenga/ sipinga (style) fakaTonga mo faka 'Afilika-'Amelika ('o hange koe lave mahu'inga mo malie 'a 'Aisea Matiu 'i 'olunga) kae tefito kihe ongo faiva ta'anga-hiva "rock-and-roll" moe "country music."
'Oku fetu'utaki vaofi fau 'ae founga/ akenga/ sipnga ta'anga hiva fakaTonga mo faka'Afilika-'Amelika (hange koe "blues," "jazz" moe "reggae" na'e lave kiai 'a 'Aisea Matiu) he ongo, fasi moe afo minoa (minor sound 'oku 'iloa 'i Tonga koe ongo, fasi moe afo "fakafa'ahikehe" [kae 'iloa he 'ahoni koe afo "fakatetevolo"] 'oe me'alea fangufangu 'oku ma'u he faiva fakatangi moe ngaahi ta'anga hiva tupu'a), 'o hange koe ongo faiva ta'anga-hiva koe "rock-and-roll" moe "country music)."
Na'e tupu foki 'ae ongo ta'anga-hiva "rock-and-roll" moe "country music)" mei he founga/ akenga/ sipinga ta'anga hiva 'ae kau 'Afilika-'Amelika he 1940 tupu moe tuku'uta 'o 'Amelika 'i 'Amelika pea toki mafola mei 'Amelika ki Mamani 'o kau ai si'i Tonga "masiva he kakai, masiva he mahafu," he lave malie 'ae punake to'a mo 'iloa ko Fakatava!
Na'e lahi hono ngaue'aki he ongo ta'anga hiva "rock-and-roll" moe "country music" 'ae ngaahi me'alea tupu'a, 'o hange koe hamoniume, valingi, penisio, kita, nafa moe ongo me'alea fakaHauai'i koe kita sitilla moe 'ukulele (kutulele) ki-mui mai ('aia na'e 'ilo lahi kiai mo poto lahi ai 'ae kau to'a 'atisi musika 'iloa mo manakoa Tonga na'a ku lave kiai ki-mu'a hono ta mo faiva).
'Oku ma'ama'a mo faingofua pe 'ae fasi fakaTonga ka 'oku toki fihi hono ngaue'aki 'ae ngaahi liliu lalahi 'e fa/ 4 ' ('o hange pe koe ta'anga-hiva "rock-and-roll" moe "country music"), aia koe liliu-fasi, liliu-ta/ liliu-taimi, liliu-to/ liliu-ki moe liliu-le'o, 'o liliu-fasi 'ae kupu kotoa ('aia 'oku 'ikai tatau ha fasi 'aha ongo kupu 'e ua/ 2), liliu mei he ta/ taimi-tuai kihe ta/ taimi-vave, liliu mei he to/ ki-ma'olalo kihe to/ ki-ma'olunga mo liliu mei he (ongo) le'o-si'i kihe (ongo) le'o-lahi.
'Oku mo'oni fau atu 'ae fehu'i malie ma'u 'a 'Aisea Matiu ki-mu'a kihe ma'uhinga ke hiki 'ae tu'unga/ tukunga 'oe ta'anga-hiva (musika) 'a Tonga kihe ngaahi fale-fiesta koniseti pea mei he ngaahi fale-fieta koniseti kihe ngaahi 'univesiti 'o Mamanilahi.
Neongo 'ene fihi mo faingata'a 'ae pole-taki kuo feia KA 'oku hoko ia koe misi 'ae "Ongo Minoa 'o Tonga" (Minor Sound of Tonga)," 'aia 'oku taki-mu'a ai 'ae mohu-faiva musika koia ko Tu'ifonualava Kaivelata (mo Hufanga), 'o tu'u-ma'u he uma-kuo-patu 'oe kau helo-to'a 'atisi faiva ta'anga-hiva (musika) 'oe KUONGAMU'A he KUOHILI (present) 'i MUI, 'o kakapa kihe KUONGAMUI he KAHA'U (future) 'i MU'A, 'aia 'oku fakafenapasi he KUONGALOTO he LOTOLOTONGA (present) 'i LOTO! ”