“ Fakamalo atu ki he kolomu 'Aati & Litilesa: Maau/Ta'anga & Hiva hono toutou 'omai 'a e ngaahi faiva ta'anga hiva kehekehe 'o hange ko e ta'anga hiva kakalla, ta'anga hiva viki, ta'anga hiva fetau mo e ta'anga hiva lakalaka.
'Oku taki 'e he ngaahi faiva ta'anga hiva kehekehe 'o hange pe ko e ngaahi 'aati kehekehe 'etau tokanga mei he felekeu 'a e politiki mo e 'ikonomika ki he maau 'o e 'aati mo e litilesa 'o tefito he potupotutatau mo e malie mo e faka'ofo'ofa.
'E lava ke lau 'a e "Lovely Hula Girl" 'a Siale Seni ko e ta'anga fio hiva viki mo hiva kakala 'o 'ikai ngata pe he falatata 'o Nuku'alofa mo e Leiola he po mahina 'i Tonga ko e palataisi ka e pehe ki he fakavale 'a e hamoniueme 'o e 'Otu Felenite 'oku takimamata 'i Tongatapu, Ha'apai mo Vava'u.
'Oku ofi 'a e fa'unga 'o e ta'anga mo e fotunga hono afo 'a e ta'anga hiva ni he akenga 'a e "rock and roll" na'e hake mai he 1960 tupu 'o mamafa hono ta ka e ma'ama'a hono fasi ko e ma'u mei he fio 'a e afo minoa 'a e kau 'Afilika-'Amelka ko e "blues" (mo e "jazz" & "reggae") & afo 'a e "country music."
Kuo to e mavahe foki 'a e musika 'a e kau 'Afilika-'Amelika 'o hange ko e "blues," "jazz" mo e "reggae" mei he ngaahi night club mo e ngaahi fale fieta koniseti ki he ngaahi 'univesiti 'a ia 'oku hoko atu ai hono ako mo fai 'e mamani.
Na'e tefito foki 'a e musika tupu'a 'a Tonga he afo minoa 'o hange pe ko 'Afilika-'Amelika ka e toki liliu mamalie ki he afo maisoa 'e he kau misinale mo e kau muli ka ko e fehu'i leva pe 'e hiki 'afe mei he ngaahi fale kalapu ki he ngaahi night club mo e ngaahi fale fieta koniseti ka e pehe ki he ngaahi 'univesiti? ”