“ Malo fau Talamatangi hono ke i 'aofaki hotau pola pea mo e fifili ma'uhinga, malie mo 'aonga hulu kuo feia. 'Oku ke 'ilo lelei pe 'o hange ko 'eku ma'u 'a e faingata'a 'o e liliu 'a e 'uhinga ha lea [tala] 'e taha ki he 'uhinga ha lea [tala] 'e taha -- pe 'uhinga ha fonua [culture] 'e taha ki he 'uhinga ha fonua [fonua] 'e taha -- 'o hange tofu ko 'ene 'asi heni hono liliu 'a e ta'anga ni he lea [tala] fakaTonga ki he lea [tala] faka'Ingilisi. 'Oku mo'oni atu ho'o fifili mo e fehu'i hono liliu 'a e: "Ma'u pe maama he matekina" [kohi / laini 6, kupu / veesi 5] he lea / tala fakaTonga ki he: "You can only get bread thro' sweat." he lea / tala faka'Ingilisi, 'a ia 'oku 'ikai ke na fenapasi," 'o ngali ofi ange hano liliu ko e: "You acquire knowledge thro' hard-work." Kaekehe na'e tefito 'eku liliu he "'uhinga" ka e 'ikai ko e "lea / tala," 'a ia na'a ku fakatatau 'a e "faimateaki / faimatekina 'o e feinga ke ma'u 'a e maama ['ilo mo e poto] he ako" ki he " kavahia / konahia / pupuha'ia 'o e feinga ke ma'u 'a e ma he fei'umu," 'o hange ko 'ene 'asi he lea Tonga heliaki [poloveape / paloveape / fakatata] malie mo loloto ko e: "'Ma'u pe ma he kakava" ['a ia 'oku 'uhinga 'a e kavahia [konahia, pupuha'ia] ke ma'u 'a e ma ke kai ko e mo'ui'anga]. 'Oku 'uhinga pe 'a e matekina ki he mateaki, 'o hange ko e ma'u 'a e vetekina mei he veteki, li'ekina mei he li'aki, lomekina mei he lomaki, tapuekina mei he tapuaki mo e ha fua.
Ka e fakatau mai mu'a ha'aku kava pea malo fau 'a e ma'u kava mo e ma'u tala ka e toki vakai ke tuki hotau efe mo hoko atu 'etau talave.
ANFF leva e malanga ka e tau,
'Ofa atu fau mo e manatu ma'u,
Hufanga. ”