Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Ako ki he Founga Hono Pelu 'o e Koloa Faka-Tonga Featured

Lady Tuna Fielakepa Lolotonga Hono Fakahinohino Founga Pelu Koloa Lady Tuna Fielakepa Lolotonga Hono Fakahinohino Founga Pelu Koloa

Nuku'alofa, 29 'Aokosi 2015. Na’e fakahoko ‘i he efiafi ‘aneafi ‘aho Falaite ko hono 28 ‘o ‘Aokosi ‘a e ako ki hono pelu ‘o e koloa faka-Tonga ‘i he Senitā Langafonua ‘a Fafine Tonga. Ko e ako ko’eni na’e fakahoko ia ‘e Lady Tuna Fielakepa pea na’e kau mai kiai moe kau fefine mei he tapa kehekehe ‘o Tongatapu.

‘I ha fake’eke’eke makehe mo Lady Fielakepa na’a ne fakahā ai koe taha’i fatongia ‘eni ‘oku mafatukituki pea ‘oku totonu ke ako’i mo fakamanatu ki he Hou’eiki Fafine ‘o e fonua he ‘oku ‘ikai koha me’a ‘eni ‘oku fakahoko noa’ia ka ‘oku fakatatau ki he tukufakaholo mo e fokotu’utu’u ‘etau nofo. Fakatatau ki he fakamatala ‘a Tuna, ko e koloa faka-Tonga mo hono pelu mo fokotu’utu’u ‘oku kehekehe pe ‘o fakatatau ki he ouau ‘oku hoko. ‘Oku kehe hono pelu 'a e koloa faka-Tonga 'i he fai’aho, mali pehē ki he me’afaka’eiki.

Lolotonga Ako Pelu Koloa

Na’e hoko atu ‘a e fakamatala ‘a Lady Fielakepa ko e Fale ‘o e Tu’i ‘oku kehe ‘a hono pelu ‘a e koloa mo hono fokotu’utu’u pea ‘oku kehe leva mo e toenga ‘o e fonua. 'Oku tatau pe he ta'ovala 'o a'u ki hono pelu, fokotu'utu'u mo fola he 'oku faka kalakalasi 'a e tu'unga ma'olunga mo 'eiki 'o e koloa faka-Tonga.

‘Oku malie ‘a e vakai ki he fatongia ko’eni he neongo ‘oku lau koe me’a si’isi’i ‘eni ka ‘oku hā mahino mai ‘oku feima’u ke ako’i ‘a e kakai fefine telia ‘a e kaha’u ‘o e fonua. Fakatatau ki he fakamatala ‘a Taumosi Hemaloto mei he Langafonua ‘a fafine Tonga “ko e taha ‘eni ha ako ‘oku ‘aonga he na’e ‘ikai ke fai ha ‘amanaki ia ‘oku lahi ‘a e ngaahi founga hono pelu ‘o e koloa faka-Tonga ka ‘oku ‘ikai ko hano pelu pē ‘o hange ko e founga anga maheni”.

Fakahinohino Founga Pelu Koloa

Ko e ako foki ko’eni ‘oku fakapa’anga ia ‘e he poloseki tokoni ki he ngāue fakamea’a, takimamata mo e angafakafonua (Handicrafts and Cultural Tourism Support Programme [HCTSP]) ‘a ia ‘oku fakapa’anga ‘e he tokoni ‘a Nu’usila. Na’e fakahoko foki ‘a e ako ki Ha’apai ‘i he uike ni pe ki he founga hono lalanga ‘o e kato mosikaka.

'Oku monu'ia 'a e fonua 'i hono kei ma'u 'a e kau taukei  mo 'ilo lahi 'o hange ko Lady Fielakepa kenau patoloaki hono ako'i mo fakahinohino 'a e ngafa maha'inga ko'eni 'i hotau tukufakaholo.

1 comment

  • Kalisi Mausia
    Kalisi Mausia Thursday, 01 June 2017 22:38 Comment Link

    Fakamalo atu he ngaue fakaofoofa oku mou fai, koe eku kii fakaekeeke pe, pe e lava nai ke online mai ha video kihe anga e ngaahi pelu koloa fakatonga koeni pe oku iai ha faahina founga e lava kemau ako ai kimautolu oku nofo muli.

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top