Faka’ali’ali ‘A’ati (Art Exhibition) “Toe Amusi” ‘a e Kulupu ‘Aati Seleka ^Featured

Ko e faka’ali’ali foki ko’eni ‘oku kamata ia mei he efiafi Tu’apulelulu 1 ‘o Tisema ‘o lele ai ki he ‘aho 8 ‘o Tisema. ‘Oku tataki foki ‘a e kulupu Seleka ‘e Tevita Mame’ivai Latu ‘a ia koe tangata ‘atisi foki ‘eni ‘oku ne nofo mo ngāue pe mei Tonga ni pea kuo ne ‘osi ma’u faka’ilonga fakaako foki ‘i he mala’e ‘o e ‘aati mei he ‘Apiako Fakafonua ‘a ‘Aositelelia ki he ‘Aati.

'Oku fakahingoa foki 'a e faka'ali'ali ko'eni koe "Toe Amusi" 'a ia 'oku 'uhinga ia ki he taimi 'oku tā ke faka'aonga'i ai 'a e tutu pe koe hiapo pea 'i he lau 'a Tevita Latu 'oku 'uhinga pe 'eni ki hono akonekina 'o e longa'i fanau ki he faiva 'a'ati telia na'a ma'u ai hanau faingamalie 'i he kaha'u kae tautefito ki he fanau 'oku taleniti 'i he faiva ni.

Ko e fakaafe fakalangilangi foki ‘o e polokalama ni ko Dr. Viliami Uasike Latu pea na’e kau kiai moe kau fakaafe tokolahi ‘o kau kiai ‘a e fānau ako mei he ngaahi lautohi si’i mo e kau ako ‘aati ‘oku nau fengaue’aki vāofi mo Tevita pehe ki he kau papalangi ‘oku nau manako ‘i he faiva ‘a’ati moe matu’a tauhi fanau pehe ki he ngaahi kaungame'a mo poupou 'o e kulupu ko'eni.

Ko e faka’ali’ali foki ko’eni ‘oku kau kiai ‘a e ngaahi ngāue ‘a e fanau ako mei he ngaahi lautohi si’i ‘a ia koe ngāue ‘a e fanauako mei he Lautohi ‘a Haveluloto pehe ki he Lautohi Pule’anga ‘a ‘Atele ‘a ia na’e lava atu foki kiai ‘a e kulupu Seleka ‘o fai e fengāue’aki mo kinautolu lolotonga ‘a e ta’u.

‘I he fakamatala ‘a Tevita Latu na’e kamata ‘enau fengāue’aki mo e ngaahi Lautohi Pule’anga he ta’u ni pea koe fuofua kau mai ‘eni ‘a e ngāue ‘a e longa’i fanau ki he’enau polokalama faka’ali’ali ‘a ia ko hono tu’o ua ‘aki foki ‘eni hono fakahoko.

‘I he lea ‘a Dr. Viliami Uasike Latu ‘i hono hopoki ‘o e polokalama ni na’a ne fakahā ai ‘a e mahu’inga ‘o e ngāue faka’aati ke hakeaki’i ‘a e taleniti ‘o e hakotupu ‘o e fonua mo ‘ene fakamālō kia Tevita Latu ‘i he malava kene vahevahe ‘ene ‘ilo mo ‘ene taukei moe hakotupu ‘o e fonua.

Na’e hoko atu ‘a Dr. Latu ‘one pehe koe natula ‘o e kau ‘Atisi ‘oku takitaha kukukuku ‘ene ‘ilo mo’ene taukei ka ‘oku makehe ‘a Tevita Latu he ‘oku lava kene vahevahe mo e hakotupu ‘oe fonua pea ‘oku fo’ou ia ki he’ene vakai.

Na’e faka’osi ‘aki ‘e Dr. Latu ‘a ‘ene fakahā' ‘oku fo’ou foki ‘a e faahinga ngāue ni ki Tonga ni ka ‘oku kamata ke manako kiai ‘a e to’utupu hange koe kulupu Seleka pea koe faka’ilonga lelei ia ki he kaha’u.

Ko e faka’ali’ali ‘aki hono ua ‘a e kulupu Seleka pea na’e a’u ki he pa’anga ‘e $7000 na’e ma’u mei hono fakatau atu ‘o ‘enau ngaahi ngāue ‘i he ‘uluaki faka’ali’ali. Koe mahu’inga ‘o e ngaahi ngāue faka’aati ‘i he faka’ali’ali ko’eni ‘oku kamata pe mei he $100 ki he $500 pea ‘oku ‘i ai moe ngaahi ngāue ‘oku fakatau hangatonu pe mei muli ‘o fakafou pe he ‘initaneti.

Na’e lava atu foki ‘a Tevita Latu mo e konga ‘ene kulupu ‘o fakahoko ‘a e fengaue’aki ‘i he mala’e ni moe fanauako mei he ‘Univesiti ‘o Massey ‘i Nu’usila pea na’e toe malava ke tu’uaki atu ai enau ngaahi ngāue pea toe fakatau atu foki ai.

‘Oku ‘amanaki ke ngata ‘a e faka’ali’ali ko’eni mei he ‘aho 8 ‘o Tisema pea ‘oku ‘atā ki ha taha pe ‘oku ne fie afea ‘a e faka’ali’ali ko’eni ‘i Haveluloto.