Kau Ongo Tonga Foaki Pale ‘Aati ‘o e Pasifiki ‘a e Creative NZ Featured
Kau ma'upale, mei hema ki mata'u: Anonymouz (Matthew Faiumu Salapu; Emerging Pacific Artist Award), David Fane (Joint Senior Artist Award), Oscar Kightley (Joint Senior Artist Award), Kolokesa Uafa Mahiona-Tuai (Special recognition Award), Tuaine Robati (Heritage Arts Award), Dr Karlo Mila (Contemporary Arts Award), Madison Nonoa (Iosefa Enari Memorial Award).
28 'Okatope, 2016. Na’e kau ‘a e ongo Tonga ko Dr Karlo Mila mo Kolokesa Uafa Mahina-Tuai he foaki pale ‘aati ‘o e Pasifiki ‘a e Creative NZ na’e fai he St James Theatre he kolomu’a ‘i Uelingatoni ‘i Nu’usila he efiafi po’uli hifo ‘o e Pulelulu 26 ‘o ‘Okatopa 2016.
Ko e ongo fakaafe fakalangilangi ko e Minisita ‘o e Pacific Peoples ko Hon. Peseta Sam Lotu-Inga mo e Minisita ‘o e Internal Affairs ko Hon. Peter Dunne. Na’e fai ‘ae lea fakaava mo e talitali ‘e he Sea ‘o e Kosilio ‘a e Creative NZ ko Dr Dick Grant.
Ko e Creative NZ ko e kupu fakapule’anga ia na’e fokotu’u ke ne tu’uaki ‘a e ‘aati ‘i Nu’usila tupu mei he’ene ma’uhinga makehe ki he ako mo e langa fakalakalaka kehekehe ‘a e fonua mo e sino ke tufaki ‘a e pa’anga ki he kau ‘atisi ‘oku nau taki hono ngaue’i ‘a e ‘aati.
Ko e katoanga fakata’u ‘eni pea ‘oku fe’unga mo e pale ‘e 6 (‘oku ma’uhinga ki he $5,000-00 takitaha ‘a e pale kotoa tukukehe ‘a e pale Senior Artist Award ‘oku fe’unga mo e $10,000-00) ‘oku foaki ki he kau tu’ukimu’a he ngaahi mala’e kehekehe ‘o e ‘aati ‘o kau ai ‘a e faiva, tufunga mo e nimamea’a ‘o hange ko e ta’anga, hiva, haka, fakaoli, fakamamahi, faita, hele’uhila, tavalivali, langafale, tatatau, mo e lālanga.
Na’e kau he ngaahi pale lalahi ‘e ono ‘a e Iosefa Enari Memorial Award (tefito he hiva kelesika moe ‘opela), Emerging Pacific Artist Award (tefito he ‘aati kehekehe), Contemporary Art Award (tefito he ‘aati kehekehe), Special Recognition Award (tefito he ‘aati kehekehe), Pacific Heritage Arts Award (tefito he ‘aati kehekehe) mo e Senior Artist Award (tefito he ‘aati kehekehe).
'Otu mu'a, mei hema ki mata'u: Dr Karlo Mila (2), Dr Dick Grant (3), Hon. Peter Dunne (4), Hon. Peseta Sam Lotu-Inga
'Otu ua, mei hema ki mata'u: Kolokesa Uafa Mahina-Tuai (2), Laumanuvao Winnie Laban.
Na’e ma’u ‘e Dr Karlo Mila ‘a e pale ‘o e Contemporary Art Award ‘o tefito he’ene takimu’a he faiva ta’anga ‘a ia na’a ne ‘osi ma’u ai ‘ae ngaahi pale lalahi pea ma’u ‘e Kolokesa Uafa Mahina-Tuai ‘a e pale ‘o e Special Recognition Award he’ene ngaue ko e art curator ‘o tefito he ngaahi fakaa’ali’ali ‘aati lahi mo lalahi mo fale’i ‘a e kau ‘atisi tokolahi.
Na’e tukupa ‘e Kolokesa Uafa Mahina-Tuai hono pale ki he’ene kui kuo pekia ko Suliasi Kulikefu Tupou ‘a ia na’a ne ako mei ai ‘a e ngaahi ‘aati tupu’a faka-Tonga lahi pea ne to e tukupa te ne ngaue’aki ‘a e pa’anga mei hono pale ke kamata’aki ‘a e Trust Fund ma’ae ngaahi ‘aati faka-Tonga ‘o tatau pe faiva, tufunga mo e nimamea’a ‘a ia ‘e fakalele ‘e he Kula-‘Uli Foundation.
