“ 'Oku mo'oni atu 'a e tukuhua 'a Moneata mo e Nepituno, pea 'oku mahino mei he ongo vakai kehekehe 'a e Nepituno ki he ongo fe'auhi tau'olunga 'a e fanau mo e kau misi na'e kau he fe'auhi fili talavou mo e hoihoifua 'a e kau finemui fili misi.
Na'a ku kau he kau mamata he fe'auhi tau'olunga 'a e fanau mo e kau misi 'i Tongatapu mo Ha'apai. Ne u tokanga'i 'a e lahi 'o e haka hoa ka e 'ikai ke mohu haka mo haka fakahokohoko haka 'o tatau 'a e haka motu'a mo e haka fo'ou.
Na'e 'ikai ma'u 'a e mafana, vela mo e tauelangi ko e 'ikai ke tatau, potupotutatau mo malie 'a e lahi taha 'o e faiva haka ka e tautefito ki he faiva hiva. 'Oku mahu'inga ke fakatokanga 'a e haka mo e hiva ki he vakai malie 'a e Nepituno.
Neongo 'a e malie 'a e faiva tala vala, teunga mo e teuteu tau'olunga ka 'oku tonu ke to e fai ha vakai hono ngaue'aki tavale 'a e kake'i mo e kaulihi he ko e katoanga fiefia ko e faiva tau'olunga ka e 'ikai ko e katoanga feke'ike'i mo e 'ita.
'Oku 'ikai nai ko e 'aati 'a e faiva tau'olunga 'oku nofo he tatau, potupotutatau mo e malie pe faka'ofo'ofa 'a ia 'oku ne toki fanau'i 'a e ongo fakalangi mo fakahevani ko e mafana, vela mo e tauelangi he ko e 'aho 'o e fiefia, tue mo e mavava. ”