“ Malo mu'a "Nepituno" 'ae ma'u ongoongo mohu mo fonu pea 'oku fakafefia fau mo fakamafana atu. 'Oku fakatu'akiato heni ha fakamalo loto'aufuato mo lotohounga kia Tevita mo 'ene kau ako 'aati he ngaue mo'oni mo malohi pea hono 'ikai fungani mo masani lahi 'ene tatau, potupotutatau mo faka'ofo'ofa/malie, 'o 'ikai ngata pe he fihitu'u hono fakafelavai 'ae kohi/ta moe va kae toe 'amo'amo ange hono fakafehauaki 'ae maama moe lanu!
'Oku matu'aki ma'uhinga foki 'ae ongoongo he 'uhinga lahi ko 'ene lave tonu he 'aati, 'o na vakavako moe ako, 'aia 'oku na hoko koe ongo poutuliki hono fakamaama mo fakalakalaka 'aha fonua. 'Oku tefito 'ae ako he kumi kihe 'ilo moe poto kae tefito 'ae 'aati he kumi kihe tatau, potupotutatau moe faka'ofo'ofa/malie, 'o hilio fakatouloua he maama, fekoekoe'i moe tau'ataina (kae 'ikai koe fakapo'uli, fekekee'i moe popula).
'Oku matu'aki ma'uhinga 'ae ngaue 'a Tevita he 'oku ne toe fakafoki 'etau tokanga, fakakaukau moe manatu kihe tukunga 'oe ako fakaTonga tupu'a, 'aia na'e makatu'unga "fakaha'a," 'o hange koe ha'a faiva, ha'a tufunga moe ha'a nimamea'a, 'aia na'e tefito ai 'ae ako kihe 'ilo moe poto, 'o hange koe ha'a faiva ta'anga moe ha'a toutaivaka he faiva, ha'a tufunga langafale moe ha'a tufunga nimatapu he tufunga moe ha'a nimamea'a lalanga moe ha'a nimamea'a tuikakala he nimamea'a.
'Oku mahino mei he ngaue faka'aati 'a Tevita kuo tatu'olahi hono faka'ali'ali 'i Tonga ni mo muli foki, 'aia 'oku kau ai 'ae faka'ali'ali 'aati ko 'eni mo 'ene kau ako 'aati ("Toe Amusi"), 'o tefito he tufunga tavalivali (material art of painting) pea 'oku toe pe 'eni ke liliu mei he "fakaha'a" kihe "fakafaleako" (koe 'apiako 'aati pe art school), 'o lesisita mo tokoni'i 'ehe Pule'anga moe fonua. 'O kapau 'e hoko 'ae misi koia 'o mo'oni 'e toki malava leva ke fao'i kihe toenga 'oe ngaahi 'aati, 'o kau kotoa kiai 'ae faiva, tufunga moe nimamea'a.
'Ofa atu fau moe 'anau ma'u. ”