Tautea Ngāue Pōpula Ta’u 15 ki he Fakapoongi Hono Uaifi Featured
Nuku’alofa, 26 Sanuali 2016. Na’e hilifaki he Fakamaau’anga ‘a e tautea ke ngāue pōpula ta’u ‘e 15 ‘a e tamai ta’u 42 ko Lokoua Taufahema ‘o Navutoka ki he hia ko e tamate tangata ‘o makatu’unga ‘i he pekia hoko uaifi ‘i Tisema 2014 mei hano lingi ‘aki ha ngako vela ‘e he faka’iloa.
Na’e to’o foki ‘a e ta’u ‘e 3 mei he tautea ‘o Taufahema ‘o makatu’unga ‘i he’ene fengāue’aki vāofi mo e kau Polisi fekau’aki mo e keisi ni pehe ki hono hisitōlia kae ‘uma’a ‘a ‘ene ngaahi lava me’a ma’a e fonua ‘o kau kiai ‘ene faiako ‘i he timi soka fakafonua si’i hifo he ta’u 17.
Na’e pekia foki ‘a e hoa ‘o Taufahema makatu’unga ‘i he vela lahi faka’ulia na’e hoko ki hono sino (tapu ange moe pekia). Na’e hā foki ‘i he ngaahi mo’oni’i me’a na’e ‘ohake ‘i he hopo ko’eni na’e fakahoko ‘e he faka’iloa ‘a e hia mafa tukutuki ni makatu’unga ‘i ha’ane fua’a tokua na’e toe text hono uaifi ki ha tangata kehe.
