'E Tuku ki Tu'a 'a Mateni Tapueluelu: Ta’efakalao hono Fokotu’u Kanititeiti Featured
Mateni Tapueluelu
Nuku’alofa, 12 Tisema 2015. Kuo tu’utu’uni ‘e he Tu’i Fakamaau Lahi Owen Paulsen ‘i he ‘aho Falaite ko hono 11 ‘o Tisema 2015 na’e ta’efakalao hono fokotu’u ‘o Mateni Tapueluleu kene hoko ko e Kanititeiti Fili Fale Alea ki he Fili Fale Alea ‘o e ‘aho 27 Novema 2014 ‘i he Vahenga Fili Tongataou 4.
Ko e tu’utu’uni foki ‘eni ‘a e Tu’i Fakamaau Lahi hili ia ‘a hono fakatonutonu fakakalao ‘e he ‘Ateni Seniale ‘Aminiasi Kefu ‘i he Kongaloto ‘o e ta’u ni 2015 ‘a e tu’unga fakalalo ‘a e hoko ‘a Mateni Tapueluelu koe Kanititeiti ki he Fili Fale Alea 2014 lolotonga ia ‘oku ‘i ai hono mo’ua ki he Fakamaau’anga ‘oku ‘ova hake ‘i he lahi ‘o e mo’ua ‘oku tu’utu’uni ‘e he Lao Fili Fale Alea 1989.
‘Oku mahino mai foki ‘oku ‘i ai ‘a e totonu ‘a Mateni ke Tangi ki he Fakamaau’anga Tangi ‘i he tu’utu’uni ko’eni ka ‘oku mahino mai ‘oku ‘i he Sea 'o e Fale Alea pe ‘a e mafai ke tuku kitu’a ‘a Mateni mei he Fale Alea.
‘I he mahino mai ko’eni na’e ‘ikai fakalao ‘a e hoko ‘a Tapueluelu koe Kanititeiti pea ‘oku fakapapau'i leva fakatatau ki he Lao ‘oku ‘ikai ha’ane totonu kene kei hoko koha Fakafofonga Fale Alea ma’a Tongatapu 4 tukukehe ange ka fou ‘i he polosesi Faka Fakamaau’anga anga maheni ‘a ia koe tangi ki he Fakamaau’anga.
‘I he taimi tatau ‘oku ‘i he Sea ‘o e Fale Alea ‘a e mafai ke tuku ‘a Tapueluelu ki tu’a ‘i he malumalu ‘o e tu’utu’uni ko’eni ‘a e Fakamaau’anga. ‘E muimui’i ‘e he ongoongo ko’eni ‘a e tu’unga ‘oku ‘i ai ‘a e fakaikiiki ‘o e tu’utu’uni ko’eni.
