'Ikai Tali Fakamaau'anga Tangi Tangi 'a 'Etuate Lavulavu Hopo Fili Fale Alea Featured
Nuku’alofa, 16 Sepitema 2015. Na’e ‘ikai tali ‘e he Fakamaau’anga Tangi ‘i he houa pongipongi ‘o e ‘aho ni Pulelulu 16 ‘o Sepitema ‘a e tangi ‘a e Faka’iloa Minisitā Ki he Ngaahi Ngāue Lalahi mo e Takimamata Etuate Sungalu Lavulavu.
Ko e tangi ‘eni ‘a e Fka’iloa fekau’aki mo e ‘ikai tali ‘e he Tu’i Fakamaau Lahi Justice Owen Paulsen ‘i he Fakamaau’anga Lahi ‘a ‘ene fokotu’u ke fakamaau’i ‘eha kau Sula ‘ene hopo mo Dr. Viliami Uasikē Latū mo ‘Aisea Silivenusi.
Ko e hopo ‘eni fekau’aki mo hono faka’ilo ‘e he ongo talatalaaki ‘a e Faka’iloa fekau’aki mo ha’ane mamau’i ‘a e Lao mo e tu’utu’uni ki he fili Fale Alea ‘o hoko ai ‘ene totongi fakafufū ‘a e kakai ke fili kiate ia ‘i he Fili Fale Alea ‘o e ‘aho 27 ‘o Novema 2014.
‘Oku mahino mai mei he tu’utu’uni ‘a e Fakamaau’anga Tangi ‘oku ‘ikai kenau tali ‘a e ngaahi makatu’unga ‘o e tangi ‘a ‘Etuate Sungalu Lavulavu pea ‘e kei tu’uma’u ai pe ‘a e hopo ko’eni ‘o hangē ko e tu’utu’uni ‘a e Tu’i Fakamaau Lahi ‘i he Fakamaau’anga Lahi ke fakahoko pe ‘e he Tu'i Fakamaau Lahi 'a e hopo ko'eni 'o fakatatau ki hono tu'unga faka-Lao.
'E tu’ulahoko ai pe hono fakahoko ‘o e hopo ni ki Vava’u 'i he faingmalie vave taha 'o hangē koe tu'utu'uni 'a e Fakamaau'anga Lahi ki mu'a pea ‘oku te’eki ke mahino mai ha ‘aho ‘e fakahoko kiai. Na’e fakafofonga’i ‘e William Clive Edwards ‘a e fa’ahi ‘a e Talatalaaki pea ‘Ofa Pouono ma’a e Tafa'aki 'a e Faka’iloa.
