Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Tu'utu'uni Tu'i Fakamaau Lahi Totongi Fakafoki Pa'anga TOP $22,000 Ki he Palēmia 'Akilisi Pohiva Featured

Tu'utu'uni Tu'i Fakamaau Lahi Totongi Fakafoki Pa'anga TOP $22,000 Ki he Palēmia 'Akilisi Pohiva

Nuku’alofa, 24 2015. Na’e tu’utu’uni ‘e he Tu’i Fakamaau Lahi Owen Paulsen ke totongi fakafoki ‘e he Fakamaau’anga ‘a e Pa’anga $22,000 ki he Palēmia Samuela ‘Akilisi Pohiva.

Na’e fakahā foki ‘i he tu’utu’uni ‘a e Fakamaau Lahi ‘i he ‘aho 22 ‘o Sune ‘oku ‘ikai ke ngofua ‘i he malumalu ‘o e Fakamaau’anga Polisi ke ‘eke ha totongi lolotonga ‘a ia hono fakahoko ‘a e fakamaau ‘eke (preliminary inquiry proceedings) ‘a ia ‘oku hā pe ia ‘i he Konga III ‘o e Lao ki he Fakamaau’anga Polisi (Magistrate’s Act).

‘I he’ene pehe leva ko e tu’utu’uni ‘a e Fakamaau Polisi ke totongi ‘a e fakamole ‘a e kau faka’iloa ke tuku fakatafa’aki ia pea ke totongi fakafoki ‘a e pa’anga ko’eni kia Samuela ‘Akilisi Pohiva. Na’e toe ‘oange foki ‘e he Tu’i Fakamaau Lahi ‘a e ‘aho ‘e 7 ki he fa’ahi ‘a e kau faka’iloa kenau fakahū mai ha’anau tali ke fakakikihi’i ‘aki ‘a e tu’utu’uni ke totongi fakafoki ‘a e pa’anga ko’eni. Ko e ‘aho ‘e 7 na’e toe ‘oange ki he loea ‘a ‘Akilisi Pohiva ke fakahoko ha tali ki heni ‘okapau ‘e fakakikihi’i ‘eni ‘e he fa’ahi ‘’a e kau faka’iloa.

Na’e ma’u foki ‘a e fakamatala mei he loea ‘a e kau faka’iloa William Edwards ‘oku nau lolotonga ngāue ke fakahoko ‘enau tangi ki he Fakamaau’anga Tangi ‘o makatu’unga ‘i he tu’utu’uni ‘a e Tu’i Fakamaau Lahi.

Kaikehe ko e puipuitu’a ‘o e hopo ko’eni ‘oku foki pe ia ki he faka’ilo hia na’e fakahoko ‘e ‘Akilisi Pohiva ‘a e Palēmia ‘o e ‘aho koia Nopele Tu’ivakanō, Pilinisesi Pilolevu, William Clive Edwards pea mo e Friendly Islands Satellite Communications Limited ‘a ia ‘oku ‘iloa ko e Tongasat ‘a ia ko hono tukuaki’i ki he ngaahi ngāue hala mo ‘ikai fakalao.

Na’e tu’utu’uni ‘e he Fakamaau Polisi ko Salesi Mafi ke tukuange ‘a e kau faka’iloa hili hano fakahoko ha fakamaau ’eke pe ‘oku totonu mo ‘i ai ha makatu’unga ke ‘ave ai ‘a e hopo ko’eni ki he Fakamaau’anga Lahi ke fakahoko hano fakamaau'i.

Na’e fakahoko foki ha tangi ‘a ‘Akilisi Pohiva ki he Fakamaau’anga Lahi ‘i he ‘aho 17 ‘o Sanuali 2014 ka na’e ‘ikai tali ‘eni ‘e he Fakamaau Lahi ko Justice Scott. Na’e kole foki ‘e he kau faka’iloa ‘a ia na’e fakafofonga’i kinautolu ‘e S.J. Stanton ke totongi ‘e he talatalaaki ‘enau fakamole $22,000 pea na’e tali ‘eni ‘e he Fakamaau’anga Polisi ‘i he ‘aho 10 ‘o Sepitema 2014.

Na’e kole foki ‘e he tafa’aki ‘a ‘Akilisi Pohiva ke fakahoko hano toe vakai (judicial review) ‘a e tu’utu’uni ‘a e Fakamaau Polisi pea na’e tali ‘eni ‘e he Tu’i Fakamaau Lahi ‘o e ‘aho koia Justice Scott ka kuopau ke fakahoko ‘o fakafou ‘i ha tangi ‘i tu’a taimi (leave to appeal out of time) ki he Fakamaau'anga Lahi ‘a ia ko e makatu’unga ia ‘o e tu’utu’uni aofangatuku ‘a e Tu’i Fakamaau Lahi Owen Paulsen ‘i he uike ni.

Na’e totongi foki ‘e ‘Akilisi ‘a e mo’ua ko’eni ki he Fakamaau’anga kimu’a pea fakahoko ‘a e lēsisita kanititeiti Fale Alea ‘o Novema 2014. Ka fakahoko ‘a e tangi ko’eni ‘a e tafa’aki ‘a e kau faka’iloa ki he Fakamaau’anga Tangi pea ‘oku mahino ‘e fakahoko 'eni ‘i Sepitema 'o e ta'u ni 'okpau 'e maau kiai.

Ko e tu’utu’uni ko’eni ‘oku makatu’unga pe ia ‘i he feinga ‘a e tafa’aki ‘a ‘Akilisi Pohiva ke fakafoki ‘a e pa’anga kuo ne totongi ‘i he tu’utu’uni ‘a e Fakamaau’anga Polisi ‘o e ‘aho 10 Sepitema 2014.

1 comment

  • MMoala
    MMoala Saturday, 25 July 2015 15:45 Comment Link

    'Oku vete fklao 'ae me'a kotoa pe, fktau'ange kihe Laumalie 'oe Mo'oni ke ne tataki 'ae me'a kotoa pe hotau ki'i Fonua, pea tau manatu'i ma'u pe 'oku 'ikai ke'iai ha taha ia 'e Haohaoa !!!

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top