Malu'i ki tu'a 'a Paula Naitoko Featured
Paula Naitoko
10 'Aokosi, 2019. Kuo tu'utu'uni 'e he Fakamaau Lahi ko Carles Cato 'i he Fakamaau'anga Lahi 'aneafi ke tauhi mo malu'i ki tu'a 'a Paula Naitoko ko e 'Ofisa Kasitomu Ma'olunga malōlō 'a ia na'e tukuaki'i ki he'ene kaunga ki hono hūta'e fakalao mai 'a e faito'o konatapu ki he fonua.
Na'e faka'ilo foki 'a Paula Naitoko pea fakahū pilisone 'o tauhi fakalao 'e he kau polisi talu mei he 'aho 23 'o 'Epeleli 'o e ta'u ni 2019.
Na'e tukuaki'i 'a Naitoko ki he'ene kaunga ki hono hū mai 'a e faito'o konatapu 'i he kalasi koe methamphetamine kilo 'e 6.7 pehe ki he kalaimi 'e 625.29 ko e cannibis mo e lolo cannibis kalami 'e 107.29 'a ia na'e puke 'o he Uafu Kuni Sālote 'i he mahina ko 'Epeleli.
Na'e ma'u fakataha foki heni mo e me'afana laifolo 'i he kalai ko e M4 pehe ki ha pekenene.
Neongo hono ke tukuange 'a Naitoko ke malu'i (bail) ki tu'a ka 'oku tu'utu'uni 'e he Fakamaau'anga ke tauhi ia 'i ha tu'unga 'e siofi malu 'e he ma'u mafai 'o kau ai hano fakafe'ao pe ia 'e ha 'ofisa polisi 'i ha feitu'u 'e 'alu kiai 'o kau ai 'a e Falemahaki, Fakamaau'anga, sio ki he'ene loea mo e ngaahi feitu'u anga maheni pehe ni.
'Oku kau ai foki mo e 'ikai ngofua ke toe folau ki ha feitu'u mei Tonga ni pea ke nofo ma'u pe 'i honau 'api 'o 'ikai ngofua ke 'alu noa'ia kiha feitu'u.
'Oku amanaki ke toe hā 'a Naitoko 'i he Fakamaau'anga 'i he 'aho Monite 'o e uike kaha'u 12 'o 'Aokosi 2019.
