Toe toloi hopo ongo Lavulavu ki 'Okatopa 2019 Featured
'Etuate mo 'Akosita Lavulavu
4 'Aokosi, 2019. Kuo toe toloi ‘e he Fakamaau’anga Lahi ‘a e hopo ‘a e Fakafofonga Fale Alea Vava’u 16 ‘Akosita Lavulavu mo hono hoa ‘Etuate Lavulavu ka koe Minisitā Malōlō ki he ‘aho 11 ‘o ‘Okatopa 2019.
Ko e hopo ko’eni na’e faka’aho ke fakahoko ‘i heFakamaau'anga Lahi 'i he ‘aho 2 ‘o Sepitema 2019 ka ko hono toe toloi ko’eni he ‘oku kei ‘i Nu’usila ‘a e taha ‘o e ongo Faka’iloa ko ‘Akosita Lavulavu ‘a ia na’e livi ke folau atu ‘o fa’ele.
‘Oku toe fakamahino mai pe foki mei eh Fakamaau'anga ko e ‘uhinga ‘oku kei Nu’usila ai ‘a ‘Akosita Lavulavu koe ‘uhinga faka-faito’o.
Na’ e faka’ilo foki ‘a e ongo Lavulavu ki he tikite ‘e 6 ‘a ia ‘oku kau kiai ‘a hono ngāue ‘aki e ngaahi fakamata loi ke ma’u ai ha pa’anga pehe ki hono lilu kākā’i ‘a e ngaahi tohi ngāue ‘o ma’u ai ‘a e pa’anga lolotonga ‘ena fakalele ‘a e ‘Apiako ‘Unuaki ‘o Tonga.
Ko e ngaahi ngāue ta’e fakalao foki ko’eni ‘oku tukuaki’i kiai ‘a e ongo Lavulavu ‘oku fekau’aki tonu ia mo ngāue ‘a e Potungāue ‘Atita ‘a e Pule’aanga na’e fakahoko fekau’aki mo e ngaahi pa’anga tokoni ‘a e Pule’anga na’e fakahū atu ki he ‘Apiako ‘Unuaki ‘o Tonga 'a ia na'a na fakalele.
Na’e feinga foki ‘a e ongo Lavulavu ke faka’ilo ‘a e Potungāue ‘Atita 'o pehe tokua na'e hala 'enau ngāue na'e fakahoko ka na’e ‘ikai ke tali ‘eni ‘e he Fakamaau’anga ‘o makatu’unga ‘i he ngaahi ‘uhinga fakalao.
Ko e ‘Apiako ‘Unuaki ‘o Tonga foki kuo ‘ikai toe lele talu mei hono faka’ilo ‘o e ongo Lavulavu.
‘Oku tali tonuhia pe foku ‘a e ongo Lavulavu ki he ngaahi tukuaki'i mo e ngaahi tikite ko’eni kuo faka'ilo kinaua kiai.
