Totongi 'e ‘Akilisi Pohiva $36,000 mo'ua 'i he hopo lau’ikovi’i Featured
'Akilisi Pohiva
19 Sanuali, 2019. Kuo totongi ‘e he Palemia ‘Akilisi Pohiva ‘i he kamata’anga ‘o e ta’u ni 2019 ‘a e fakamole (cost) ‘o e hopo ki he’ene lau’ikovi’i ‘a William Clive Edwards ‘i he Nusipepa Kele’a ‘i he ta’u 2012.
Na’e tuku mai foki ha fakamatala ‘a ‘Akilisi Pohiva ‘i he Nusipepa Kele’a ‘i he ta’u 2012 ‘o pehe ko Edwards koe toitoi’anga ia ‘o e kau faihia.
Na’e faka’ilo foki ‘e Edwards ‘a Pohiva ‘i he ta’u 2012 ki he fakamatala loi mo 'eke hono ongoongo pea na’e vetehia pe ‘a Pohiva 'i he hopo ko'eni na’e 'ikai mo'oni pea hala ‘ene fakamatala ka na’e iku ke tukuange ia ‘i he Fakamaau’anga Polisi.
Na’e tangi ‘a Edwards ki he Fakamaau’anga Lahi pea na’e toki aofangatuku ‘a e hopo ko’eni ‘i he faka’osinga ‘o e ta’u 2018 'i he Fakamaau'anga Lahi.
Na’e toe tangi ‘a Pohiva ke fakafepaki’i ‘a e tu'utu'uni kene totongi 'a e ngaahi fakamole ki he hopo ko’eni ka na’e tu’utu’uni ‘e he Fakamaau’anga Lahi kene totongi ‘a e fakamole ‘a Edwards he koia foki na'e 'ulungia 'i he hopo ni.
Fakatatau ki he fakamatala na'e ma'u 'e he ongoongo ni mei he ‘Ofisi Lao ‘o Edwards (Edwardslaw) na’e totongi ‘a e pa’anga ko’eni ‘e $36,000-00 tupu ko’eni ki honau ‘ofisi ‘i he ‘uluaki uike ‘o Sanuali 'o e ta'u ni.
Ko Laki Niu na'a ne fakafofonga’i ‘a ‘Akilisi Pohiva 'i he hopo tangi pea William Clive Edwards pe na'a ne fakafofonga'i ia.
