‘Ikai tali Fakamaau’anga kole tangi ‘a e Nusipepa Kele’a ^Featured

Na’e tu’utu’uni foki ‘e Fakamaau Penisimani Ma’u ‘i he ‘aho 20 ‘o Me 2016 ‘i he Fakamaau’anga Polisi ke mo’ua pa’anga ‘e $10,000-00 ‘a Laucala Tapueluelu koe Faipulusi, ‘Ofa Vatikani koe ‘Etita ‘o e ‘aho koia, mo e Nusipepa Kele’a fakataha mo e ngaahi totongi kehe fekau’aki mo ‘enau lau’ikovi’i ‘a ‘Aisea Filihia mo ‘ene pisinisi fekau’aki mo e kau toli ‘akau ‘i ‘Aositelelia.

Na’e tu’utu’uni ‘e he Fakamaau’anga ke fakamalohi’i hono totongi ‘o e mo’ua ko’eni ‘i he mahina ko Siulai 2017 pea na’e ngāue atu ‘a e Va’a Peilifi ‘a e Pule’anga ke fakatautuki ‘a e koloa ‘a e Nusipea Kele’a.

Na’e kole ai ‘a Vatikani mo e Nusipepa Kele’a ‘i he malumalu ‘o e Pule fo’ou ‘o e Nusipepa ni Siaosi Pohiva ke ta’ofi ‘a e ngāue ‘a e Va’a Peilifi pea ke tuku ange ha faingamalie kenau tangi fekau’aki mo e tu’utu’uni ‘a e Fakamaau’anga Polisi.

Na’e iku ke tukuaki’i ai ‘e he Nusipepa Kele’a ‘a ‘enau loea ‘Ofa Pouono ki he ‘ikai ke fakahoko ha tangi fekau’aki mo e tu’utu’uni ‘a e Fakamaau’anga Polisi.

Nae fakamahino ‘e he Tu’i Fakamaau Lahi na’e ‘i ai ‘a e kole ‘a e Nusipepa Kele’a 'o fakafoua mai 'i heenau loea 'Ofa Pouono pehe kia Vatikani ke ta’ofi ‘a e ngāue ‘a e Va’a peilifi ka na’e ‘ikai ke faka’asi ange ai ‘e fai ha tangi.

Na’a e ne toe hoko atu ‘o fakamahino koe lava ‘eni ‘a e mahina e 17 mo e ‘ikai ke fai ha tangi ‘a ia ‘oku fehu’ia ‘a e tu’inga falala’anga ‘o e fakamatala ‘a e tafa’aki ‘a e Nusipepa Kele’a tukukehe ange ‘a e ‘ikai ha makatu’unga lelei ke toe fai ai ha tangi.

Na’e ‘ikai tali ‘a e tangi ko’eni pea na’e toe tu’utu’uni kenau totongi ‘a e fakamole ‘a e tafa’aki ‘a Filihia fakataha mo e mo'ua na'e 'uluaki tu'utu'uni.

Na’e fakafofonga’i ‘a Filihia ‘e William Clive Edwards pea Siaosi Pohiva mo ‘Ofa Vatikani ma’a e Nusipepa Kele’a.