Logo
Print this page

Pekia matāpule mei Pea 'i hano hoka hele'i Featured

Pekia matāpule mei Pea 'i hano hoka hele'i

6 Fepueli, 2018. 'Oku lolotonga fakahoko 'a e fakatotolo a e kau polisi ki he pekia 'a ha matapule ta'u 27 mei Pea 'i he po'uli hifo 'o e 'aho Sapate 4 'o Fepueli 'a ia koe Sapate ia kuo 'osi.

 Na'e ma'u foki 'e he kau polisi ha fetu'utaki mei he Falemahaki Vaiola fakafuofua ki he taimi 10:00 po'uli 'o fakaha mai 'oku 'i ai ha matapule na'e leleaki'i ange ki he loki fakatu'utamaki fakavaveave 'oku hoko kiai ha ngaahi lavelavea lalahi mei hano hoka hele'i.

Ko e me'apango he na'e si'i malolo ai pe 'a e matapule ni 'i hono a'utaki mai pe ki he Falemahaki pea pau ai ke fakahoko leva 'a e fetu'utaki ko'eni ki he kau polisi.

Na'e fakahoko leva 'a e ngaue a e kau polisi o puke mai ai pe he taimi 3:00 hengihengi Monite 5  'o Fepueli ha matapule ta'u 32 mei Te'ekiu felave'i mo e pekia ko'eni.

Ko e fakamatala 'oku ma'u 'e he kau polisi na'e ma'u kava malohi fakataha 'a e pekia mo e tokotaha ko'eni kuo tukuaki'i 'i ha feitu'u tatau pe 'i Te'ekiu.

Na'e ma'u mai foki 'a e sino 'o e pekia 'o leleaki'i ki he Falemahaki Vaiola 'i he ve'e hala 'i Fatai.

'Oku hokohoko atu pe 'a e fakatotolo 'a e kau polisi fekau'aki mo e keisi ko'eni.

Nepituno Media Online © 2015. All rights reserved.