Faka’ilo kautaha me’alele SBT ki hono kakaa’i ‘o ha kasitoma ^Featured

Kuo ma’u ‘e he ongoongo ni ha fakamatala mei he taha ‘o e kau kasitoma ‘a e ki’i kautaha ni ‘o fakahā ‘a ‘ene ta’efiemalie ki he ngāue pango mo kakaa kuo fakahoko ‘e he kautaha ni fekau’aki mo ‘ene pasi na’e fai ‘a e alea mo e kautaha ni ke ‘omai mei Siapani.

Ko e alea ko’eni na’e fakahoko ‘i he mahina ko ‘Epeleli 2017 pea ‘oku a’u mai ki he ‘aho ni ‘oku te’eki pe ke ma’u ‘a e pasi ko’eni.

‘Oku fakaloloma he na’e ‘osi totongi ‘a e pa’anga ‘e 20,000-00 koe tipositi ki he kautaha ko’eni ‘i ‘Epeleli ka kuo siva ‘a e ‘amanaki pea ‘oku ‘ikai toe ha loi kehekehe hono ‘omai mei he kautaha ni.

Ko e kautaha foki ko’eni ‘oku tu’u honau ‘ofisi ‘i he Uata Building ‘i he Hala Taufa’ahau pea ‘oku talēkita ‘i he kautaha ko’eni ‘a Lesieli Langi pea mo Soana To’aho ‘a ia koe uaifi ia ‘o tangata tila me’alele ko Filimone To’aho ‘o Tokomololo.

‘I he fakamatala ‘a e kasitoma ko’eni kuo fuoloa ‘enau tukufetuli mo e kautaha ni pea ‘oku ‘ikai pe ke toe tali mai ha telefoni ia ‘o a’u ki he a’utonu atu ki he ‘api nofo’anga ‘o e ongo talēkita mo e ‘ikai pe toe ma’u.

‘I he fakamatala ‘a e kasitoma koeni na’e fai ‘a e fetu’utaki ‘a ‘ene loea ki he kautaha ‘i he mahina ko Sepitema 2017 pea tuku atu ‘a e taimi ke totongi fakafoki mai ai ‘a ‘ene pa’anga ‘e 20,000-00 mo e ‘ikai toe ha fakamatala kehekehe hono ‘omai.

Na’e iku ki he hake ‘a e kataki ia ‘a e talēkita ‘e taha ‘o fakahā ko e kautaha ni ko e SBT koe kautaha pe ia ‘a Filimone To’aho ‘o Tokomololo pea na’e kole ange pe kiate ia ke lēsisita hono hingoa koe’uhi koe ngaahi fakatonutonu ‘a Filimone To’aho mo e kakai ‘o e fonua ‘i he’ene kautaha na’e ui koe Super Cheap.

‘Oku mahino foki ko Filimone To’aho pe na’e kaunga ki he kautaha me’alele koe Temo Tonga ‘a ia na’a ne fengāue’aki vāofi ai mo Sione ‘Eniketi Taufa pea iku ki he ngaahi fakatonutonu fakalao ‘a ia na’e tuku atu ‘i he ngaahi mitia.

‘Oku ‘ikai foki ke toe fiema’u pasi ‘a e kasitoma ko’eni ka ‘oku ne fiema’u ke fakafoki mai ‘e ne pa’anga ‘e 20,000-00 tipositi pea mo ‘ene na’ina’i ki he kakai ‘o e fonua kenau toe tokanga ange ki he fa’ahinga ngāue pango pehe ni ‘oku fakahoko ‘e he ni’ihi ko’eni.

‘Oku toe fehu’ia foki heni pe koe hā ‘a e me’a ‘a e ma’u mafai ‘e fai ki he kakai tatau pe hange ko To’aho ‘oku nau fakahoko ‘a e ngaue pango natula tatau pea toutou fakahoko ki he kakai ‘o e fonua.

Na’e fai ‘a e fetu’utaki ki he ‘Ofisi mo e ngaahi fika telefoni ‘a e kautaha SBT mo e ‘ikai pe ha tali mai.