Logo
Print this page

Tukuange ‘e he Fakamaau’anga ‘Amelika ‘a Dean Jay Fletcher neongo ‘ene fakapoongi hono mali ‘i Tonga ni Featured

Dean Jay Fletcher 'oku tokoto pea 'i he tafa'aki mata'u koe 'Ateni Seniale Le'ole'o 'a Tonga 'Aminiasi Kefu Dean Jay Fletcher 'oku tokoto pea 'i he tafa'aki mata'u koe 'Ateni Seniale Le'ole'o 'a Tonga 'Aminiasi Kefu

5 Novema, 2017. Kuo tukuange ‘e he Fakamaau’anga ‘Amelika ‘i he Siteiti ko Hawaii ‘a e matapule ‘Amelika koia ko Dean Jay Fletcher neongo hono tukuaki’i ia ki he’ene tamate’i hono mali ‘i Vava’u ‘i he ta’u 2016.

Na’e hola foki ‘a Fletcher mei hano tauhi fakalao ia ‘i he malumalu ‘o e Potungaue Polisi ‘i Vava’u ‘one folau ai ‘i ha vaka ‘iote ki Ha’amoa ‘Amelika pea ‘ave foki mei ai ki Hawaii.

‘Oku ‘i ai foki ‘a e talite ‘a Tonga ni mo e Pule’anga ‘Amelika fekau’aki mo hano fakafoki ‘oha tokotaha faihia (extradition treaty) ka ‘oku ta’efiemalie lahi ‘a e Pule’anga Tonga ki hono tukuange ko’eni ‘o Fletcher.

‘Oku ‘i ai ‘a e hoha’a ‘a e Pule’anga ‘Amelika na’a tautea mate pea tautau ‘a Fletcher ‘i Tonga ni.

‘Oku faka’ikai’i foki ‘eni ‘e he ‘Ateni Seniale Le’ole’o ‘a Tonga ‘Aminiasi Kefu pea na’a ne fakamahino ‘oku ‘ikai toe fakahoko ‘a e tautea tautau ‘i Tonga ni talu mei he ta’u 1981.

Na’e hoha’a foki ‘a Kefu ki hono tukuange koia ‘o Fletcher ‘e he Fakamaau’anga pea na’a ne toe fakamahino foki ‘oku lahi ‘a e ngaahi Siteiti ‘i ‘Amelika ‘oku kei mo’ui ai ‘a e tautea mate.

‘Oku kei hokohoko atu pe ‘a e feinga ‘a e Pule’anga Tonga ke fakafoki mai ‘a Fletcher ke fakahoko hano fakamaau’i ‘o fakatatau ki he lao mo e hia na’a ne fakahoko.

Nepituno Media Online © 2015. All rights reserved.