Lahi launga’i ngaahi kautaha tila me’alele mo’enau fekau’aki mo Filimone To’aho ^Featured

Kuo ‘ikai ngata he launga ‘a e kau kasitoma ki he ngaahi kautaha lao kuo nau a’u ‘o kole tokoni ki he ngaahi kautaha mītia kenau  tokoni ange ki honau ngaahi faingata’a’ia.

‘Oku ‘ikai foki koe toki taimi ‘eni ke paaki atu ai ‘e he ongoongo ni ‘a e ngaahi talanoa fakaloloma ko’eni ka ‘oku ‘i ai mo e ngaahi fakamo’oni kuo ma’u ‘o kau ai ‘a e ngaahi tohi tali totongi, tohi mei he kau Fakafofonga Lao ‘o a’u ki he ngaahi fe ‘imeili ‘aki ‘a si’i kakai ‘oku launga mo e kau tila me’alele ko’eni.

‘Oku fu’u mahu’inga foki ‘a e tokoni ‘a e mītia ‘i he tafa’aki ko’eni ki he ma’u mafai ke si’i malu’i ‘a e kakai ‘o e fonua mei he ngaahi ngāue pango, ta’e’ofa mo fakavalevale ko’eni.

‘Oku hoko ‘a e taufetuli ‘a e kakai tokolahi mo e matāpule na’e ‘a ‘ana ‘a e Kautaha Super Cheap Tonga ka kuo ‘osi tamate’i ko Filimone To’aho ko e konga ia ‘o e ngaahi launga ki he ngaahi kautaha lao ‘i he fonua.

‘Oku tukuaki’i ‘oku kaunga tonu ‘a e matāpule ko’eni ki he ongo kautaha hū me’alele ‘e ua ‘a ia koe SBT pea mo e Temo Tonga Motors pea ‘oku mahino pe ia ‘oku lēsisita ‘a e ongo kautaha ko’eni he hingoa kehe ka ‘oku tu’u mei mui ‘a To’aho.

Ko To’aho pe ‘oku fai kiai ‘a e fetu’utaki ‘i he taimi lahi pea koia ‘oku ‘eke kiai ‘e he kau launga ‘enau silini mo e ngaahi palomesi kuo ne fakahoko kae ‘ikai pe ke hoko.

‘Oku kei laini hokohoko pe foki ‘i he Fakamaau’anga ‘a e fakatonutonu ‘a To’aho ‘a ia na’e ‘a’ana ‘a e Kautaha Super Cheap Tonga ka kuo mate mo e kakai tokolahi ‘o e fonua ‘o kau ai a e si’i kainga mei he ngaahi ‘otu motu ‘i tahi fekau’aki mo ‘enau pa’anga kuo totongi kae ‘ikai pe ke ma’u mai ha me’alele ia pea koe kole atu ke fakafoki mai ‘a e silini kuo ‘ikai toe lava ia.

Kuo laui ta'u 'a e tukufetuli ko'eni pea 'oku mahino pe 'e 'ikai toe ma'u ha pa'anga ia mei he ngaahi 'eke ko'eni.

Na’e toe paaki atu pe he ongoongo ni ‘i he mahina ko Sepitema 2016 ‘a e kole mo e fakatokanga mei he Kautaha hū me’alele ‘iloa mei Siapani ki Tonga ni mo mamani koe Autorec ‘a ia na’a nau faka’ilo ‘a To’aho ki he kakai ‘o e fonua kenau tokanga fekau’aki mo e ngaahi ngāue pango ko’eni ‘oku fakahoko ‘e he matāpule ni.

Kaikehe ‘oku mahino mai ‘oku kei hoko pe pea ‘oku ma’u ‘e he ongoongo ni ‘a e ngaahi tohi launga’i ‘o To’aho ki he me’a tatau pe ‘a ia ‘oku kei hokohoko atu pe ‘ene fakahoko 'a e fa'ahinga ngaue ko'eni.

Ko e taha ‘o e launga koha finemui mei Popua ‘oku fekau’aki ia mo ‘ene motokā pea kau kiai moe launga mei he ongomatu’a na’a na totongi ‘a e silini kia To’aho fekau’aki mo e veeni uta ka ‘oku ‘ikai pe ke ma’u ia.

Ko e fehu’i leva pe koe hā ‘a e ngāue ‘e malava ke fai ke malu’i si’i kakai ‘oku ‘ikai ha’a nau hu’uhu’u pea nau toe tu’u lavea ngofua ki he fa’ahinga ngāue pango ko’eni.?

‘Oku 'i ai 'a e tui ‘oku ‘i ai e fatongia mafatukituki heni ki he kau fa’u lao pehe ki he ngaahi kupu fekau’aki ‘o e ma’u mafai he koe kaveinga ‘eni ‘oku lahi ‘ene hoko pea ‘oku hangē ha tahi ‘oku hu’a mai.

Na’e fakamatala ‘a e tokotaha ‘o e kau launga ‘a ia ’oku ‘ikai loto ke fakahā hono hingoa na’e a’u tonu ki he ‘api nofo’anga ‘o To’aho pea fakahā mei ai ‘e hono tokoua mo’oni ‘o pehe ‘oku ne tui ko ‘ene me’alele he’ikai pe ke ma’u ia.

Na’e fai ‘a e fetu’utaki ‘a e ongoongo ni kia To’aho ‘o fakafou ‘i he peesi facebook ‘a e ongoongo ni ‘a ia ‘oku fa’a angamaheni ‘aki ‘a e fetu’utaki mo To’aho ka ‘oku ‘ikai pe ha toe tali meiate ia.

'I he taimi tatau 'oku 'i ai 'a e ni'ihi 'oku fengāue'aki mo To'aho pea 'oku kau mo kinautolu hono tukuaki'i mo hono launga'i fekau'aki mo e me'a ni.