Fakahū Pilīsone matāpule na’a ne tā fakalavea’i ‘a Kelekolio Tapueluelu Featured
Kelekolio Tapueluelu
16 June, 2017. Kuo fakapapau’i mai mei he Komisiona Polisi Steven Caldwell kuo puke ’e he kau polisi ‘o faka hūpilisone mo tauhi fakalao ‘i he taimi 1:00 pm ‘o e ‘aho ni ‘a e matāpule ta'u 49 fekau'aki mo e tā mo hono fakalavea’i ‘o Kelekolio Tapueluelu.
‘Oku mahino pe foki koe tā mo e fakalavea ko’eni na’e hoko ia ‘i he ‘aho Pulelulu 15 ‘o Sune ‘a ia koe Pulelulu ia ‘o e uike ni ‘i he Hala Lelue ‘i Kolofo’ou.
Na'e hoko foki ‘a e makuku 'i he vaha'a 'o e matāpule ko ‘Onitulei Manu mo Kelekolio Tapueluelu 'i he 'aho tatau ‘a ia ‘oku ‘i ai ‘a e tui neongo ‘oku ‘ikai fakahā mai ‘e he kau Polisi hono hingoa ka koe matāpule ‘eni kuo puke ‘e he kau polisi.
‘Oku lolotonga fakahoko ‘a e fakatotolo ‘a e kau polisi ki he me’a ni ka ‘oku mahino foki ko Kelekolio Tapueluelu ‘oku nofo Nu’usila pea ‘oku ne ‘i Tonga ni ke poupou ki hono teke ke fakahoko mai ‘a e sipoti ki Tonga ni ‘i he ta’u 2019.
Kuo fakamatala foki 'e he ngaahi kautaha ongoongo pehē ki he mītia faka-sosiale na'e fakahoko e felau'aki 'a Tapueluelu mo e kau poupou 'o e Palēmia 'o hoko ai 'a e tā ko'eni.
Kuo fakapapau’i foki mei he Komisiona Polisi ‘a e mahu’inga ke malu’i ‘a e mo’ui mo e totonu ‘a Kelekolio Tapueleuleu ‘o fakatatau ki he lao ‘o e fonua.
'Oku kei hokohoko atu pe 'a e ngāue 'a e kau polisi ki he me'a ni.
