Tangi ‘a Lord Nuku ki he Fakamaau’anga Tangi ^Featured

Na’e tu’utu’uni foki ‘ehe Fakamaau Lahi Micheal Scott ‘i he ‘aho 5 ‘o Mē ke mo’ua fakataha ‘a Lord Nuku ‘a ia na’e Faka’iloa ‘Uluaki  fakataha mo e Faka’iloa Ua Kautaha Yan Jian Group Co. Limited pea mo e Faka’iloa Tolu ko e Kautaha Yan Jian Tonga Limited fe’unga mo e Pa’anga Tonga ‘e 5 Miliona tupu (TOP 5,556,000.00).

Ko e tu’utu’uni foki ‘eni makatu’unga ‘i he ‘eke ‘e Lord Luani ‘a e maumau ki hono ‘api tukuhau na’e fakalea he hopo sivile ni koe Lot 90 na’e lisi ‘e Lord Nuku ‘i he ‘uhinga faka-komesiale ka na’e iku ke ngāue’aki ia ‘e he Faka’iloa Ua mo e Tolu ke keli mo fetuku mei ai ‘a e maka.

Na’e toe kau atu ki he ‘eke ni mo e ‘api tukuhau ‘a ia na’e fakalea he hopo sivile ni koe Lot 85 'a ia na’e ‘eke ‘ehe mamahi na’e toe keli mo fetuku mei ai ‘a e maka ka ko e ‘api tukuhau 'eni na’e ‘osi foki ki he ‘aofinima ‘o e Talatalaaki.

‘I he’ene tu’u 'i he taimi ni ‘oku mahino mai mei he Fakafofonga Lao ‘a Lord Nuku ki he'ene teu tangi ko'eni William Clive Edwards ‘oku lolotonga fakahoko ‘a e ngāue ke fakahū atu ‘a e tangi ‘a Lord Nuku ki he Fakamaau’anga Tangi fekau’aki mo e tu’utu’uni ko’eni 'a e Fakamaau'anga Lahi.

'Oku toe ma'u foki 'e he ongoongo ni mo e fakamatala 'e toe fakahoko pe mo e tangi 'a e Faka'iloa Ua mo e Faka'iloa Tolu fekau'aki mo e tu'utu'uni ko'eni 'o e 'aho 5 'o Mē.

‘Oku mahino foki ‘e toki aofangatuku ‘e he Fakamaau’anga Tangi ha toe tu’utu’uni ki he hopo ni ‘o fakafuofua ki he Mahina ko Sepitema.