Lahi pau'u kau tila me’alele mei Siapani: Faka’ilo e Tavatu’utolu Motors Featured
Nissan Cube
3 Fepuelei, 2017. Kuo launga’i ‘e he ni’ihi ‘a e ki’i kautaha hū me’alele mei Siapani ‘oku ‘iloa koe Tavatu’utolu Motors ‘i Longolongo.
Ko e faka’ilo ‘eni ‘o makatu’unga ‘i hono ma’u ‘a e pa’anga he founga kākā mo e loi ‘o si’i tōnoa ai ‘a e ‘amanaki ‘a e si’i kakai ko’eni.
Kuo launga’i foki ‘e Viliami Lolohea ‘o Pangai Ha’apai ‘a e kautaha ni ‘o makatu’unga ‘i he’ene totongi ha pa’anga ‘e $7900 ki he pule ‘o e kautaha ni Malia Selupe ke hū mai ‘ene me’alele Nissan Cube ka koe talu hono fakahoko ‘a e totongi ko’eni ‘oku te’eki ai a’u mai ‘a e me’a lele ia ko’eni.
Na’e fakamo’oni ‘a e aleapau ‘i he ‘aho 18 ‘o ‘Okatopa 2016 ‘i Longolongo ‘a Viliami Lolohea mo e pule ‘o e kautaha ni Malia Selupe pea totongi he ‘aho ‘aho tatau ‘e Viliami Lolohea ‘a e pa’anga Tonga ‘e $7900.00.
Na’e fai ‘a e femahino’aki ‘e tau mai ‘a e vaka ‘e ‘omai ai ‘a e me’alele Nissan Cube ‘a Viliami Lolohea ‘i he ‘aho 28 ‘o Novema 2016 pea na’e ‘ikai hoko ‘eni. Na’e toe fakahā foki ‘e foki ‘e he pule ‘o e kautaha ni kiate ia ‘e matolo ‘a e taimi tau mai ‘a e vaka ki he ‘aho 3 ‘o Tisema 2016 pea ne toe fakaha kiate ia ‘e toloi mei ai ki he ‘aho 8 Tisema 2016 pea toe toloi mei ai ki he ‘aho 15 Tisema .
Na’e iku ai ke folau mai ‘a Viliami Lolohea mo ‘ene fine’eiki mei Ha’apai ke vakai ki he tu’unga ‘o ‘ene me’alele ‘o a’u mai ki he ‘aho ni ‘oku te’eki pe ke ‘oange ha tali pau. ‘I he fakaha ‘e Viliami Lolohea ‘oku loto ia ke fakafoki kakato mai ‘ene pa’anga ‘e $7900.00.
Na’e a’utaki foki ‘a e tohi ‘a e loea ‘a Viliami Lolohea ki he kautaha ni pea kuo fakamahino mai ‘e Viliami Lolohea kuo ne faka’ilo ‘a e me’a ni ki he kau Polisi.
Na’e toe fakaha foki mei he ‘ofisi fakafofonga lao ‘a Lolohea kuo nau ‘osi ‘ave ‘a e tatau ‘o e aleapau, tali totongi mo e ngaahi pepa kehe fekau’aki mo e fakatau ko’eni ki he kau polisi.
‘Oku ma’u foki ‘ehe ongoongo ni ‘a e fakamatala falala’anga ‘oku toe ‘i ai pe mo e ngaahi launga kehe ki he kau polisi fekau’aki mo e kauataha nipea ‘oku lolotonga fakahoko ‘a e ngaue kiai.
‘I ha fetu’utaki ‘a e ongoongo ki he pule ‘o e kauatha ni na’e ‘ikai kene faingamalie ke ‘omai ha’a ne lau.
