Ongo popula hola fakatu’utamaki pea na toe to'o me’atau ^Featured

Ko ongo popula hola ko’eni ko Viliami Kupu mo ‘Amoni Fifita ‘a ia ‘oku na ‘i he ta’u 20 tupu pea na’a na hola mei he ‘Apitanga Polisi Nuku’alofa fakafuofua ki he taimi 5:30 ‘i he pongipongi ‘aneafi Tusite 31 Sanuali.

‘I he fakamatala mei he Potungaue Polisi ‘oku mahino mai na’e fakahoko ‘e he ongo popula ni ha kaiha’a fakamalohi ngaue’aki ha me’atau ‘i ha falekoloa ‘i Kolovai ‘aneafi ai pe fakafuofua ki he taimi 3:00 efiafi.

‘Oku fakatokanga mamafa ‘a e Ma'u Mafai ke fakamama’o mei he ongo popula ko’eni he ‘oku na fakatu’utamaki pea ‘oku ‘iate kinaua mo e me’atau.

Kuo na’ina’i mo e Tokoni Komisiona Polisi Pelenatita Fe'ao Vaisuai ki he kakai ‘o e fonua kenau toe tokanga ange 'i ha fakatu'utamaki e ala hoko 'o fakatupu 'e he toko ua ko'eni.

‘Oku pehe ko Kupu na’e sio faka’osi kiai ‘oku ne tui ‘a e falani ‘uli’uli mo e talausese mutu ‘uli’uli pea ko Fififta leva ko e falani nima mutu hinehina, talausese mutu lanu mata mo e kepi lanu puluu.

‘I ha fakamatala ‘a Tokoni Komisiona Polisi Pelenatita Fe'ao Vaisuai ko Kupu ‘oku lolotonga tauhi fakalao ia ki he fakatupu lavea pea ko Fifita ‘oku tauhi ia ki he haefale mo e kaiha’a.

‘Oku lolotonga ngaue atu ‘a e va’a makehe ‘a e kau polisi ko e Tactical Response Group ki hono kumi ‘o e ongo popula ni.