Nō pa’anga malu’i ‘aki e me’alele rental kehe ^Featured

Na’e tukuange mai foki ‘i he ngaahi mītia fekau’aki moha fefine na’a ne haea ha ngaahi me’alele rental ‘i he mahina ko Tīsema pea ne fakatau atu kae hola ia ki muli. ‘Oku mahino mai mei he fakatamala kuo ma’u ‘e he ongoongo ni ‘oku hoko ‘a e me’a ni pea ‘oku lahilahi foki.

‘I he fakahā mei he taha ‘o e ngaahi ‘ofisi lao na’a nau ma’u ha launga mei he taha ‘o e ngaahi kautaha nō pa’anga 'i Tongatapu ni ko e ATL Finance 'i Halaleva ‘oku nau fehangahangai mo e palopalema tatau ‘i he ngāue ‘a e kau pau’u ni.

‘I he fakamatala ‘oku ma’u na’e ‘i ai ‘a e fefine mei Ma’ufanga na’a ne nō ha pa’anga lahi mei he’enau kautaha kae malu’i ‘aki ‘a e motokā. Na’e faka’ohovale kiate kinautolu ‘a e a’u ange ‘a e kau polisi ‘o mahino ko e motokā ‘eni ia ‘a e kautaha rental me’alele kehe ia.

‘Oku mahino mei he fakamatala ko e motokā ko’eni na’e haea mai pe ia pea liliu ‘a e pepa fekau’aki mo e totonu ki hono ma’u (ownership) ‘o e motokā ko’eni ki he hingoa ‘o e fefine ni kae malava ke malu’i ‘aki ‘ene nō ko’eni pea folau leva ia ki muli.

‘Oku ‘ikai ngata heni ‘oku kaungā kau a e tokotaha ni mo e kau fefine kehe ‘a ia ko hono famili ofi ki he me’a ni pea koe motokā tatau pe ‘oku feliuliuaki ‘a e pepa fekau’aki mo e totonu ki hono ma’u (ownership) kae malava ke malu’i ‘aki ‘a e nō he ngaahi kautaha kehekehe pe.

‘I he fakamatala mei he kautaha nō ko’eni ‘oku mahino mai ‘oku hā ngali maau pe ‘a e ngaahi pepa mei he ma’u mafai ki he me’alele ka ‘oku nau fakatumutumu ‘i hono malava ke fakahoko hono feliuliuaki ‘o e pepa totonu ki hono ma’u (ownership) ‘o e ngaahi me’alele rental ‘oku pa’usi’i ko’eni.

‘Oku fehu’ia he taimi tatau pe ko e hā e ‘uhinga ‘oku malava ai ‘eni ‘a ia ko e me’a ‘oku ha’u ki he fakakaukau ‘a e kautaha ni na’a ‘oku ‘i ai ha taha ‘i loto he va’a ki he ngaahi me’alele ‘oku ne tokonia e kau pau’u ni pe ko e hamumu pe fehalaaki ‘i he fakahoko fatongia ‘o malava ke hoko 'ai ‘eni pea koe liliu kaka'i pe 'eni ia 'o e ngaahi pepa (forgery).

‘I ha faka’eke’eke ki he taha ‘o e ngaahi kautaha rental me’alele na’e mahino mei ai koe mo’oni ‘oku hoko ‘eni pehe ki he keisi ‘oku lolotonga hoko ka ‘oku nau tuku ki he kau polisi kenau ngāue kiai.

Ko e fakatokanga lelei ‘eni ia ki he ngaahi pisinisi tautautefito ki he ngaahi kautaha nō pa’anga mo rental me’alele kenau toe tokanga ange he ‘oku kamata ke ‘asi ‘i he fonua ni ‘a e fa’ahinga ngāue pango mo ta’e’ofa pehe ni.

‘I he taimi tatau ‘oku ngāue ‘a e kautaha lao ni pehe ki he kau polisi mo e kautaha nō pa’anga ko’eni ki he me’a ni.