Ta'efakalao hono fakamalōlō’i ‘a e kau Talēkita ‘o e Poate Takimamata ‘a Tonga Featured
Hon. Semisi Sika
22 Tisema, 2016. Kuo tu’utu’uni ‘e he Tu’i Fakamaau Lahi Owen Paulse ‘i he Fakamaau’anga Lahi ‘i he ‘aho 20 ‘o Tisema ni na’e hala ‘a e tu’utu’uni ‘a e Minisitā Takimamata Hon. Semisi Sika ke fakamalōlō’i ‘a e kau Talēkita ‘o e Poate Takimamata ‘a Tonga (Tonga tourism Authority).
Na’e fakamalōlō’i foki ‘a e toko 4 ko’eni ‘e Hon. Sika ‘i he ‘aho 17 ‘o Sune 2016 pea na’e makatu’unga ‘eni ‘i he tui ‘a Hon. Sika kuo ‘osi honau taimi he na’a nau hū hake pe koe fetongi ‘a e kau Talēkita ‘e toko 3 na’a nau fakafisi ‘a ia ko Shane Walker, Ross Chapman pea mo Paul Johanson pea koe ‘osi pe honau taimi pea koe ‘osi ai pe ia moe taimi ‘o e kau fetongi.
Na’a fakamahino ‘e he Tu’i Fakamaau Lahi na’e ta’efakalao ‘a e tu’utu’uni ‘a Sika pea ‘oku te’eki ke kakato ‘a e ta’u ‘e 3 na’e fokotu’u ai ‘a e toko 3 ko’eni ki he lakanga Talēkita ‘o kau ai moe Sea ‘o e Poate ‘e he Minisitā Malōlō ‘Etuate Lavulavu.
Na’e toe fakamahino pe foki ‘i he fakatonutonu ko’eni na’e ‘iai ‘a e tohi ki mu’a ‘a e Minisitā Malōlō ‘Etuate Lavulavu ki a Tomifa Paea ‘oku fokotu’u ia kene hoko ko e Sea ‘o e Poate Takimamata ‘a Tonga ‘i he ta’u ‘e 3.
Na’e toe fakahā ai pe ‘i he tu’utu’uni ‘a e Tu’i Fakamaau Lahi ‘e toki fakahoko ha’ane tu’utu’uni aofangatuku pe koe ha ‘e fakahoko ki he kau mamahi ‘i ha toe fakataha ‘a e ongo tafa’aki ki he Fakamaau’anga.
Ko Petunia Tupou na’e fakafofonga ma’a e kau Talatalaaki ‘a ia koe kau Talēkita ia ‘e toko 4 na’e Fakamalōlō’i pea ko Sione Sisifa ma’a e Faka’iloa ‘a ia ko e Minisitā ia Hon. Semisi Sika.22
5 comments
-
malo admin e kataki pea feunga pe mo koe ae kataki lahi. ofa atu kihe ngaue oku fai
-
Malo e fakatokanga pea 'oua teke tokanga koe kiai admin he 'oku 'iai ho'o ngaue 'oku toe mahu'inga ange. Kapau 'e 'ikai ha komeni 'oku sai pe moia he 'oku kanolelei mo mahino ngofua e ngaahi ongoongo ia heni.
-
'Oku fakatokanga atu heni kia kinautolu 'oku nau komeni he paenga ni 'oku 'ikai ke puli 'a kinautolu 'oku nau comment heni pea 'oku 'i ai 'a e niihi 'oku nau lea 'ikai fe'unga mo 'ita tokua he 'ikai tukuange atu 'enau komeni. Kapau temau tuku kotoa atu 'a e ngaahi komeni hange koia 'oku lau fakafo'ituitui 'oku 'ikai fe'unga ia pea teke loto mamahi ai.
Tuku kemau fakahoko homau fatongia ke tau'ataina pea 'oku te'eki kemau 'oatu ha ongoongo ta'efe'unga mo 'ikai mo'oni heni.
Malo,
Admin -
Osi taimi ke fili ha kau minisita oku ilo lao ke nau oo o tuutuuni fakatatau kihe lao koe atunga ee tae ilo koe totongi ehe kakai totongi tukuhau e moua koe vale
-
Pe kohai naane falei koe Minisita ke tuli taefakalao sii kau Poate? Pe koeha kuo fehalaaki pehee ai e u tuutuuni a e kau Minisita e Puleanga oe Kakai?