‘Ikai ha makatu'unga faka’ilo ‘e he Pangikē Siaina (PICB) ‘a e Pangikē Pule: Fakamaau'anga ^Featured

Koe faka’ilo foki ‘eni ‘e he Pangikē Siaina (PICB) ‘a e Pangikē Pule mo e Kōvana fekau’aki mo hono to’o ‘enau laiseni ‘i he mahina ko Siulai 2016.

‘I he tu’utu’uni ‘a e Tu’i Fakamaay Lahi na’a ne fakamahino ai ‘oku ‘ikai ha ‘uhinga lelei ke fakahoko ai ‘a e faka’ilo ko’eni pea na’e ‘osi fakahoko pe ‘eni ki he tafa’aki ‘a e Pangikē Siaina (PICB) ‘i he mahina ko ‘Aokosi.

Fakatatau ki he fakamatala ‘a e Matangitonga ‘i he ‘aho 22 Nōvema, 2016, na’e fakahū mai foki ki he Fakamaau’anga ‘e he Pangikē Pule mo e Kōvana Dr. Sione Ngongo Kioa ha fokotu’u fakalao ke tamate’i ‘a e eke pe faka’ilo ko’eni na’e fakahoko ‘e he Pangikē Siaina pea ‘oange ai mo e faingamalie ki he ki he tafa’aki ‘a e Pangikē Siaina kenau holomui kae ‘oua ‘e ‘eke kiate kinautolu ha fakamole ka na’e ‘ikai tali ‘eni.

Na’e tukuange ‘e he Tu’i Fakamaau Lahi ha faingamalie ki he Pangikē Siaina kenau kole ki hano toe vakai ‘e he Fakamaau’anga (Judicial Review) ‘a e tu’utu’uni ‘a e Pangikē Pule ke to’o ‘enau laiseni ‘i he mahina ko Siulai.

Ko e fakamole ‘o e hopo ko’eni na’e tu’utu’uni ‘e he Tu’i Fakamaau Lahi ke fua kotoa ‘e he Pangikē Siaina ‘o talu mei he kamata mai ‘a e ‘eke ko’eni he mahina ko ‘Aokosi ‘o e ta’u ni.

Ko Sifa Tu’utafaiva na’a ne fakafofonga’i ‘a e Pangikē Siaina pea A.H. Waalkens QC pea mo Ralph Stephenson ma’ae he Pangikē Pule mo e Kōvana Dr. Sione Ngongo Kioa.