Puke kau Polisi fu’u maliuana ‘e 458 ‘i ‘Eua Featured
'Akau koe Maliuana
18 Novema, 2016. Na’e puke ‘e he kau Polisi ‘i hano ngāue’aki ha tohi kumi koloa ‘e ua ‘i he ‘aho Tūsite mo e Pulelulu ‘o e uike ni ha fu’u ‘akau maliuana ‘e 458 ‘a ia ‘oku fakafuofua hono mahu’inga ka fakatau atu mo e pa’anga ‘e ua kilu (TOP 200,000).
Fakatatau ki he fakamatala ‘a e Pule Polisi ‘o e ‘Apitanga Nuku’alofa Tevita Fifita koe ngāue ko’eni na’e fakahoko ia makatu’unga ‘i hano lipooti ‘eha taha na’e fanongo ki he me’afana na’e pā ‘i he taha ‘o e ngaahi ‘api ‘uta ‘i ‘Ohonua ‘i he pongipongi Tūsite 15.
Na’e fakafolau atu leva ha toko 11 mei he va’a (Tactical Response Unit and the Police Drug Squad) ‘a e Potungāue Polisi ki ‘Eua he ho’atā pe koia ke fakahoko ‘a e ngāue ki he keisi ko’eni.
Na’e puke leva ai ‘e he kau Polisi ha toko ua tangata ‘o ma’u ai ‘a e me’atau koe laifolo .22 ‘a ia ‘oku tauhi ta’efakalo pehe ki he maliuana lahi ko’eni.
‘Oku kau foki ‘eni he maliuana lahi kuo puke ‘i Tonga ni pea ‘oku kei hokohoko atu ai pe ‘a e ngāue ‘a e kau Polisi ki he keisi ko’eni.
