‘Ikai tali ‘e he Tu’i Fakamaau Lahi kole ‘a Tomifa Paea mo Simana Kami ke fakafoki ‘a e tu’utu’uni ‘a Hon. Semisi Sika Featured
19 September, 2016. Na’e ‘ikai tali ‘e he Tu’i Fakamaau Lahi Owen Paulsen ‘i he ‘aho Tusite 13 ‘o Sepitema ‘a e fokotu’u mei he ongo Talatalaaki Tomifa Paea mo Simana Kami ki ha tu’utu’uni Fakamaau’anga ke fakafoki (injunction) ‘a e tu’utu’uni ‘a e Minisita Takimamata Hon. Semisi Sika ke fakamalolo’i kinaua mei he Poate Ma’u Mafai ki he Takimamata.
‘I he tu’utu’uni ‘a e Tu’i Fkamaau Lahi na’a ne pehe ai ‘e fakatu’utamaki kapau ‘e ‘ikai ikuna ‘a e ongo Talatalaaki pea ‘i he ‘uhinga koia ‘oku totonu ke fakahoko ‘a e faka’amu ‘a e Ma’u Mafai ‘a ia koe Minisita ia mo e Pule’anga.
Ko hono fili foki ‘o Tomifa Paea mo Simana Kami na’e fakahoko ia ‘e ‘Etuate Lavulavu lolotonga ‘e ne hoko koe Minisita ‘o e Potungaue Takimamata ‘i he ta’u 2015. Na’e kole foki ‘e he ongo Talatalaaki ki ha tu’utu’uni ‘a e Fakamaau’anga ke fakafoki ‘a e tu’utu’uni ‘a Semisi Sika ke tuku kinau ki tu’a pea mo hano toe vakai fakalao ‘a e tu’utu’uni na’e fakahoko ‘e Hon. Semisi Sika
Na’e tali ‘e Tu’i Fakamaau Lahi ia ke toe vakai’i ‘a e tu’utu’uni ‘a Hon. Sika kae ‘ikai kene tali ke toe fakafoki ‘a e ongo Talatalaaki ki he Poate. Na’e fakaha ‘e he ongo Talatalaaki na’e fili nau ki he teemi koe ta’u ‘e 3 ka na'e fakaha ‘e he Tu’i Fakamaau Lahi na’e ‘ikai ha lave ‘a e tu’utu’uni ‘a e Kapineti ki ha taimi ke na ‘i he Poate ai.
