Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

'Ikai ha mafai Palemia ke fakamalōlō’i 'a Lord Sevele: Tu'i Fakamaau Lahi Featured

Lord Sevele 'o Vailahi mo e Palemia 'Akilisi Pohiva Lord Sevele 'o Vailahi mo e Palemia 'Akilisi Pohiva

Nuku'alofa 26 'Aokosi, 2016. Kuo tu'utu'uni 'e he Tu'i Fakamaau Lahi Owen Paulsen 'i he 'aho Pulelulu 24 'o 'Aokosi ke tali 'a e kole mei he tafa'aki 'a e Talatalaaki (Lord Sevele) ke fakahoko ha tu'utu'uni fakataimi (interim injunction) ke ta'ofi 'a e tafa'aki 'a e Taukapo (Palemia 'Akilisi Pohiva ‘a ia ‘oku to e Sea he Ma’u mafai ki he ‘Atita mo e Pule).

'Oku makatu'unga foki 'a e tu'utu'uni ko'eni 'a e Tu'i Fakamaau Lahi 'i he 'ikai ha mafai 'o e Palemia mo e Ma’u mafai ki he ‘Atita mo e Pule ke fakamalolo'i 'a Lord Sevele mei he lakanga na'e fokotu'u kiai 'i he malumalu 'o e Lao ki he Fokotu’utu’u ki he Sipoti ‘a e Pasifiki 2013.

'Oku fakaikiiki atu heni 'a hono liliu faka-Tonga 'o e tu'utu'uni 'a e Tu'i Fakamaau Lahi Owen Paulsen;

[1] KO E TU’UTU’UNI ‘ENI ‘A E FAKAMAAU’ANGA‘OKU FAKAHOKO KOE’UHI KO E KOLE MEI HE TALATALAAKI KE TA’OFI FAKATAIMI ‘A E KAU TAUKAPO MEI HONO FAKAHOKO ‘A ‘ENAU TU’UTU’UNI NE FAI ‘I HE ‘AHO 26 ‘O ME 2016 KE TUKU KITU’A ‘A E TALATALAAKI MEI HONO LAKANGA KO E ‘OFISA PULE NGAUE MO E SEA ‘O E KOMITI FOKOTU’UTU’U ‘A TONGA KI HE SIPOTI ‘A E PASIFIKI, PEA KE KUMI HANO FETONGI, PEA TA’OFI MO’ENE VAHE MO E NGAAHI MONU’IA ‘O E LAKANGA.

[4] ‘I he konga kimui ‘o e ta’u 2012, ne mahino ai ko Tonga ko e fonua ia ke fai ki ai ‘a e Sipoti Pasifiki ‘i he 2019, pea ne paasi ai ‘a e Lao ki he Fokotu’utu’u ki he Sipoti ‘a e Pasifiki 2013 ke ne fakahoko ‘aki ‘a e ngaahi fokotu’utu’u ki hono fakahoko e Sipoti.

[5] Na’e fokotu’u ‘e he mafai ‘i he kupu 3 ‘o e Lao ni ‘a e Sino fakalao ko ia koe Komiti Fokotu’utu’u ‘a Tonga ki he Sipoti (the Organizing Committee) ke ne tokanga’i mo pule’i e ngaahi ngaue kotoa fekau’aki mo e teuteu ki he Sipoti kau ai mo hono fakalele mo pule’i ‘a hono fakahoko e Sipoti.

[6] Na’e fokotu’u ‘e Komiti Fakotu’utu’u (Organizing Committee) ‘a e Talatalaaki ki he lakanga ko e ‘Ofisa Pule Ngaue ‘a e Komiti fakatatau ki he mafai fakalao ‘oku ‘oange ‘e he kupu 9(1) ‘o e Lao. Ko e Komiti ‘eni ‘oku ne fakangaue’i ‘a e Talatalaaki, pea ‘i ai mo ’enau Aleapau Ngaue mei ‘Epeleli 2014 ki ‘Okatopa 2019.

[8] ‘Oku hanga ‘e he kupu 9(2) ‘o e Lao ‘o fakaikiiki mai ‘ae ngaahi fatongia ‘o e ‘Ofisa Pule Ngaue, kau atu ki ia mo e lakanga ko e Sea ‘i he Komiti Fokotu’utu’u (Organizing Committee)

[12] Ko e ‘uluaki Taukapo ko e Palemia ‘o Tonga ‘a ia ‘oku to e Sea he Ma’u mafai ki he ‘Atita mo e Pule.

[13] ‘I he ‘aho 15 ‘o Tisema 2015 ne tohi ai ‘a e Palemia ki he Talatalaaki fekau’aki mo e ngaahi kaveinga mo e ngaahi me’a ne ‘ikai ke fiemalie ki ai ‘i he faifatongia ‘a e Talatalaaki mo ‘ene kau ngaue…pea ne fokotu’u ai ke fakafisi ai ‘a e Talatalaaki, Takitoa Taumoepeau pea mo Sakopo Lolohea. ‘I he ‘aho 17 ‘o Tisema pe ne tali ai ‘e he Talatalaaki ‘a e tohi ni mo ne fakaha ai ‘a e ‘ikai ke ne tali ‘e ia pea pehe ki he ongo tangata ngaue ‘a e fokotu’u ke nau fakafisi.

[14] ‘I he ‘aho 26 ‘o Me 2016, na’e ma’u ai ‘e he Talatalaaki ‘a e tohi me I he ‘uluaki Taukapo (Palemia) ‘aia ‘oku fakataumu’a ke fakangata ‘I he vave taha ‘a e faifatongia ‘a e ‘Ofisa Pule Ngaue ‘a e Komiti Fokotu’utu’u (Organizing Committtee). Ko e konga ‘eni ‘o e tohi:

‘I hoku lakanga ko e Palemia ‘o Tonga pea mo e Sea ‘o e Ma’u Mafai ki he ‘Atita mo e Pule, ‘oku ou fakaha ai heni kiate koe kuo ‘osi fakahoko ‘ e he Ma’u Mafai ‘aki ‘a e loto ki ai ‘a e tokolahi ‘a e ongo tu’utu’uni ko ‘eni:

1. Ke fakangata ‘a e faifatongia ngaue ena a Lord Sevele ko e ‘Ofisa Pule Ngaue ‘mo e Sea ‘i he Komiti Fokotu’utu’u ‘i he vave taha, kau ai mo hono vahenga mo e ngaahi monu’ia ‘o e lakanga ni, pea ke ne mavahe leva mei he ‘Ofisi ‘o e Komiti mei he taimi 4:30 efiafi ‘o e ‘aho Falaite ko hono 27 ‘o Me 2016;
pea
2. Ke fakanofo leva ‘a e Fakahinohino Lao Pule (Solicitor General) ke ne hoko ko e ‘Ofisa Pule Ngaue mo Sea fakataimi ‘o e Komiti Fokotu’utu’u (Organizing Committee) ‘i he malumalu pe ‘o ‘ene ngaue ‘i he lolotonga ni – ‘e fakahoko ‘eni ‘i he vave taha ka e ‘oua leva kuo to e fanongonongo atu.

[16] Na’e ‘ikai foki ke tali ‘e he Talatalaaki ia ‘a e tu’utu’uni ko ‘eni ne fakahoko ange ‘e he Palemia, pea ne hoko atu pe ‘ene faifatongia ‘a ‘ana.

Na’e pehe pe foki mo e ‘ikai ke tali ‘a e tu’utu’uni ko ‘eni ‘e he Kosilio Sipoti ‘a e Pasifiki. Pea na’e hanga leva ‘e he Kosilio ‘o tukuange mai ‘i he ongoongo ‘a e ‘ikai ke nau tali ‘a e tu’utu’uni ko ‘eni ‘a e Palemia mo e Ma’u Mafai koe’uhi ‘oku ‘ikai ha nau mafai fakalao ki ai.

‘OKU ‘I AI NAI HA MAFAI FAKALAO ‘O E PALEMIA MO E MA’U MAFAI KI HE ‘ATITA MOE PULE KE FAKANGATA ‘AE FAIFATONGIA NGAUE ‘A E TALATALAAKI? KO E FEHU’I MAHU’INGA TAHA ‘ENI ‘I HE HOPO, PEA KOE HA NAI ‘A E FAKA’UHINGA LAO ‘A E ‘EIKI TU’I FAKAMAAU LAHI KI AI?

‘I HE ‘ENE TALI KI NGAAHI FAKAMALANGA ‘A E LOEA MA’AE KAU TAUKAPO, ‘O PEHE ‘OKU ‘I AI ‘A E MAFAI ‘O E MA’U MAFAI KE NE FAKANGATA ‘AE FAIFATONGIA ‘A E TALATALAAKI, NE PEHE ‘E HE TU’I FAKAMAAU LAHI:

[ 38] KO E TALATALAAKI ‘OKU FAKANGAUE’I IA ‘E HE KOMITI FOKOTU’UTU’U PEA KO E KOMITI PE KO IA ‘E TAHA ‘’OKU ‘OANGE KI AI ‘E HE LAO – ‘I HE KUPU 9(1) ‘A E MAFAI KE FAKANGATA ‘A ‘ENE FAIFATONGIA NGAUE ‘AIA ‘OKU MAKATU’UNGA AI ‘A ‘ENE MEMIPA ‘I HE KOMITI FOKOTU’UTU’U (ORGANIZING COMMITTEE).

[39] ‘I he’eku fakakaukau, ‘oku ‘ikai ‘oange ‘e he Lao ha mafai ki he Ma’u Mafai ke ne fakangata ‘a e faifatongia ngaue ‘ae Pule Ngaue/Talatalaaki ‘i he malumalu ‘o e kupu 7 pe ha toe kupu ange.

[40] Ko ia ai ‘oku ‘ikai ha mafai ia ‘o e Ma’u Mafai ke ne hanga ‘o fetongi fakataimi pe ha toe founga kehe ‘a e ‘Ofisa Pule Ngaue/Talatalaaki ‘aki ‘a e Fakahinohino Lao Pule’o hange koia ne fakataumu’a ki ai.

[43] Ko e ngaahi fakamo’oni ko ‘eni ‘oku ‘i he Fakamaau’anga ni, tautautefito ki fuakava ‘a e ‘Eiki Palemia ‘oku hange ‘oku ne faka’ali’ali mai ai ‘a e ‘ikai ha ‘uhinga malohi pe ko e ‘ai’ainoa’ia.

[44] Makatu’unga ‘i he ngaahi ‘uhinga ko’eni ‘oku ou tali lelei kuo hanga ‘e he Talatalaaki ‘o ‘omai ha makatu’unga fe’unga ke ne poupou ‘aki ‘a e kaveinga ‘oku ne taukave’i mai ko e feinga ko’eni ke tuku ia ki tu’a mei hono lakanga ko e Pule Ngaue na’e ‘ikai ke fakalao.

AOFANGATUKU

[51] Kuo hanga ‘e he Talatalaaki ‘o fakamahino mai kiate au ‘oku ‘i ai e makatu’unga malohi ‘i he‘ene faka’ilo ko’eni ‘a e kau Taukapo ki he ngaue ta’efakalao ‘a ‘enau feinga ke tuku ia kitu’a mei hono lakalanga ko e ‘Ofisa Pule Ngaue pea mo ta’ofi ‘a e ngaahi monu’ia ‘o e lakanga ko ia. ‘I he ‘eku vakai’i ‘a e totonu ‘a e ongo fa’ahi, ‘oku tui ‘oku totonu ke u tali ‘a e kole ko’eni mei he Talatalaaki ke ta’ofi fakataimi ‘a e Kau Taukapo mei ha’anau feinga ke tuku kitu’a ‘a e Talatalaaki mei hono lakanga ko e ‘Ofisa Pule Ngaue, pea mo fekau kinautolu ke nau totongi ange hono vahenga mo e ngaahi monu’ia ke he, ka e ‘oua leva kuo fakahoko ‘a e hopo kakato ‘o e faka’ilo ni. Teu fakahoko leva ‘a e ngaahi tu’utu’uni fekau’aki mo’eni.

TU’UTU’UNI

Ko ‘eku tu’utu’uni ‘eni ‘i he taimi ni:

‘Oku ta’ofi ‘e he Fakamaau’anga ni ‘a e Kau Taukapo (‘a ia ko e Palemia mo e Komiti Ma’u Mafai ki he ‘Atita mo e Pule) mo ‘enau kau ngaue, fakafofonga pe kau sevaniti mei ha feinga pe fakahoko ha ngaue ke tuku ai kitu’a ‘a e ‘Ofisa Pule Ngaue ‘o e Komiti Fokotu’utu’u ‘a Tonga ki he Sipoti ‘a e Pasifiki (‘a ia na’e fili ki ai ‘o fakatatau ki he Lao Fokotu’utu’u ki he Sipoti ‘a e Pasifiki 2013 ), pea ‘e ‘oange kiate ia ‘a e kotoa ‘o hono vahenga mo e ngaahi monu’ia hono kotoa ‘oku totonu ke ne ma’u, pea kau ai mo ia kotoa ne ta’ofi mei ‘iate ia mei he ‘aho 1 ‘o Siulai 2016.

Pea ko e fakamole ‘a e Talatalaaki ki he hopo ni ‘e fua ia ‘ehe Kau Takakapo ‘o fakatatau ki he tu’utu’uni ‘a e Fai Lesisita ‘okapau ‘e ‘ikai fai ha felotoi ki ai ‘a e ongo fa’ahi.

5 comments

  • Jay
    Jay Wednesday, 31 August 2016 09:33 Comment Link

    Ko e fai pe eni ia 'e he Palemia 'i he'ene fua'a 'i he lahi ange 'a e vahe ia 'a Sevele 'i he komiti ko eni 'i ai ko e Palemia 'o Tonga. Ko e vahe 'o e Palemia 'oku 'i he $100,000 tupu si'i pe ia pe 'oku a'u koaa 'o taha kilu pe 'ikai. Ka ko e vahe 'a Sevele 'i he komiti ko 'eni 'oku $180,000 tukukehe ange 'a e ngaahi monu'ia kehe. Tatau pe eni mo 'ene feinga ke hanga 'e he Remuneration Authority 'o assess 'a e vahe 'a e kau CEO 'o e ngaahi Poate tautautefito ki he 'Uhila mo e TCC 'i he'ene 'ilo 'oku laka mama'o ange 'a 'ena vahe ia 'a naua 'i ai. Faka'ofa ko e ta'e fiema'ulalo, 'ikai ke fakamaloo'ia pe he vahe lahi 'oku ne ma'u he 'oku fu'u lahi ange 'ene vahe ia 'a'ana he poto 'oku ne ma'u.

    Report
  • sai tau ilo
    sai tau ilo Saturday, 27 August 2016 12:16 Comment Link

    Toki mahino mai e loto kuo fonu 'i he fklielia moe palaku 'i he PM ko eni

    'Ofa mai a PM he kuo mahino ki he kakai ho'o vili ta'e'unua mo ho'o fehi'a kia Feleti Sevel 'a eee koee nane tokoni'i koe he kuohili.

    Sio hifo kuo vaivaia ho palalulu moho hokotanga hui

    Report
  • Filimone
    Filimone Saturday, 27 August 2016 10:01 Comment Link

    Koe 'oho noa'ia koe ngaue 'ae kau fale'i moe sekelitali 'ae PM, hahaaaaa!

    Report
  • Inoke
    Inoke Friday, 26 August 2016 23:42 Comment Link

    Akilisi oku ke ilo ko hoo moua he lakanga e fua ia ehe totongi tukuhau a e kakai? E tuku atee hoo taamate tangata

    Report
  • Roy
    Roy Friday, 26 August 2016 22:21 Comment Link

    Kuo lahi ange 'oho no'ia 'etau PM pea kuo fu'u 'ilonga. 'Ofa mai kau fale'i 'o tokoni he kuo motu'a e tangata'eiki.

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top