Hokahele’i ha uaifi ‘e hono husepaniti ‘i ha kē faka’api Featured
Neiafu, 18 Siulai 2016. ‘Oku lolotonga tokoto ‘i he falemahaki Ngū ha fefine ta’u 29 hili ia hano toutou hoka ‘aki ha hele ‘e hono husepaniti ‘i Talau Vava’u. Na’e hoko ‘eni ‘i he pongipongi Tokonaki ko hono 16 Siulai hili ha kē felauaki ‘a e ongo matu’a ni.
Na’e hoko foki ha kē he vaha’a ‘a e ongo matu’a ni ‘i he pō Falaite 15 Siulai kimu’a ia pea ‘alu ‘a e husepaniti ‘o konā ‘i he’ene loto mamahi. Na’e foki mai ‘a e husepaniti ni ‘i he pongipongi Tokonaki pea hoko ai ‘a e fakalavea lahi ko’eni.
Ko e hele na’e na’e ngāue’aki ko e hele ngaohi kai (Kitchen Knife) pea kuo puke ‘e he kau polisi ‘a e hele ko’eni fakataha mo hono fakahū pilisone ‘o e husepaniti ko’eni ‘o tauhi.
Fakatatau ki ha fakamatala mei he Potungāue Polisi ‘oku ‘i he tu’unga fakafiemalie pe ‘a e uaifi ni pea na’e mahino na’e fakahoko ‘a e hoka hele ko’eni ki hono kia, kete kae pehe ki hono va’e.
'Oku 'ikai ke tukuange mai 'a e hingoa 'o e ongo matu'a ni koe 'uhinga faka ngāue pe pea 'oku faka’ilo foki ‘a e husepaniti ko’eni ki he fakalavea lahi pea ‘oku fakatatali kene hā he Fakamaau’anga.
