Toe faka'ilo tokoua Kautaha Liiki (TNRL) talangata'a ki he Fakamaau'anga Featured
Nuku’alofa, 4 Sune 2016. Na’e toe ha he Fakamaau’anga Lahi ‘aneafi Falaite 3 Sune ‘a e tokoua ko e ongo memipa ‘o e Poate Liiki Fakafonua ‘a Tonga Tonga National Rugby League Incorporated (TNRL) ‘i hono faka’ilo kinaua ki he talangata’a ki he Fakamaau’anga.
Ko e tokoua ko’eni ko Mātani Mataele mo Stan Moheloa ‘a ia ‘oku tukuaki’i kinaua ki hono toho ‘o e pa’anga mei he ‘akauni ‘a e TNRL lolotonga ia kuo tu’utu’uni ‘e he Fakamaau’anga Lahi ‘i he ‘aho 11 ‘o Mē ke ‘oua na’a toe fakahoko hano toho ha pa’anga mei he ‘akauni ‘a e TNRL ‘i he Pangikē ANZ kae ‘oua kuo maau ‘a e fakatonutonu ko’eni.
‘Oku fakafuofua ki he pa’anga ‘e $7000 na’e fakahoko hono toho ko’eni lolotonga ia ‘oku tapui fakatatau ki he tu’utu’uni ‘a e Tu’i Fakamaau Lahi Owen Paulsen. Na’e file foki ‘e William Edwards Jr. ‘a e faka’ilo ko’eni ‘o fakafofonga’i ‘a e tafa’aki ‘a e Talatalaaki ‘i he hopo ni.
Na’e ‘oatu foki ‘e he ongoongo ni ha fakamatala fekau’aki mo e hopo ni ‘i he ‘aho 16 ‘o Mē 2016 pea ‘oku fakahoko hono muimui’i foki.
 talangata'a ki he Fakamaau'anga "Pin It")