Toe Mo’ua $28,000 ‘Etita, Faipulusi mo e Nusipepa Kele’a ki he Lau'ikovi'i Featured
Nuku’alofa, 20 Mē, 2016. Kuo tu’utu’uni ‘e he Fakamaau Polisi ko Penisimani Ma’u 'i he pongipongi 'o e 'aho ni ke mo’ua ‘a e ‘Etita ‘Ofa Vatikani, Faipulusi Laucala Pohiva mo e Nusipepa Kele’a fe’unga mo e pa’anga ‘e $28,000 ki he lau’ikovi’i mo hono paaki ha fakamatala ‘ikai mo’oni mo loi.
Ko e hopo foki ‘eni he vaha’a ‘o e Talatalaaki ‘Aisea Filihia mo e kau Faka’iloa hili ia hano paaki ‘e he Nusipepa Kele’a ha ‘atikolo ‘i he ‘aho 18 ‘o Me 2015 ‘a ia na’e ‘ulu’i tohi ‘o pehe; “Vahe pa’anga AUD$33.80 he uike pea ‘eke ‘a e AUD$70,000 mei he kau toli.
Na’e tu’utu’uni foki ‘e he Fakamaau Polisi Penisimani Ma’u ke tali katoa ‘a e ‘eke ‘a e tafa'aki 'a e Talatalaaki pea ke totongi ‘e he kau Faka’iloa ‘a e $10,000 ki he Talatalaaki ‘a ia koe maumau lahi taha ia ‘oku malava 'eke ‘i he malumalu ‘o e Fakamaau’anga Polisi pea toe tali foki ke totongi ‘a e ngaahi fakamole ‘a e tafa’aki Talatalaaki ‘a ia na’e fe’unga mo e $18,000.
Na’e makatu’unga ‘eni ‘i he ‘ikai ke malava ke fakamo’oni’i ‘e he tafa’aki ‘a e kau Faka’iloa ‘a e ‘uhinga ‘enau paaki ‘a e ‘atikolo pea ne tu’unga ai ‘a e ‘ikai ke tali ‘e he Fakamaau ‘enau taukapo. 'Ika ngata ai ka na'e mahino koe fakahoko 'o e ongoongo ko'eni 'i he laumalie mo e taumu'a ke tukuhifo mo fakangalikovi'i 'o hange ko 'ene hā he tu'utu'uni 'a Ma'u.
Na’e hā mahino pe foki mei he tu’utu’uni ‘a Ma’u ‘a e ‘ikai mo’oni ‘a e fakamatala ‘a e ‘atikolo ko’eni pea na’a ne fakatupu ‘a e maumau ki he ongoongo ‘o e Talatalaaki pea fakatupu fehi’anekina ‘e he kakai neongo koe ongoongo loi mo ‘ikai mo’oni na’a nau paaki.
Na’e fakafofonga’i ‘e William Clive Edwards ‘a e Talatalaaki, ‘Ofa Pouono ma’a Laucala Pohiva mo e Nusipepa Kele’a pea fakafofong’i pe ‘e ‘Ofa Vatikani ia.
