Menu
cache/resized/7a303faa48902efd848c7494b9385c2b.jpg

RED

Rapid Engineering Diagnostic

Specialize in:

...
Latest News

Fehu’ia tu’unga falala’anga Semisi Sika: Tu’utu’uni Hopo ‘a e ‘Akapulu Liiki (TNRL) Featured

Palesiteni TNRL Semisi Sika lolotonga feinga pa'anga Timi Mate Ma'a Tonga ki he Tau'i Ipu Mamani 2013 Palesiteni TNRL Semisi Sika lolotonga feinga pa'anga Timi Mate Ma'a Tonga ki he Tau'i Ipu Mamani 2013

Nuku'alofa, 16 Mē 2016. Na’e fakahoko ‘e Tu’i  Fakamaau Lahi Owen Paulsen ‘i ha’a ne tu’utu’u ni fakataimi (Interim Ruling) fe’unga mo e peesi ‘e 40 ‘i he ‘aho 11 ‘o Mē fekau’aki mo e hopo ‘eke ‘i he vaha’a ‘o e kau Talatalaaki ‘a ia ko Silivenusi Taumoepeau, Tavake Fangupo mo Taufa Fukofuka mo e kau Faka’iloa ‘a ia ko Semisi Sika, Stan Moheloa mo e Tonga National Rugby League Incorporated (TNRL).

Na’e makatu’unga foki ‘a e hopo ni ko hono ‘eke ‘e he kau Talatalaaki ‘a ia ko e kau memipa pē mo kinautolu ‘o e Poate TNRL ‘a e tu’unga ‘oku ‘i ai ‘a hono fakalele ‘o e ‘Akapulu Liiki ‘i Tonga ‘o kau ai ‘a ‘ikai muimui ‘a e kau faka’iloa ki he Konisitūtone ‘a e Poate, ‘ikai ha Fakamatala Pa’anga talu mei he ta’u 2012, ‘ikai ke toe fakahoko ha fili lakakanga talu mei he 2012, toho mo ngāue’aki ‘a e pa’anga ‘a e Poate ‘ikai fakangofua ‘e he Poate TNRL ‘i ha fakataha mo e ‘ikai ke fakahoko ha fakamatala pa’anga ki he tu’unga hono fakamoleki ‘o e pa’anga ‘e $250,000 na’e me’a’ofa’aki ‘e Pule’anga ke vahe ‘a e fanau va’inga Mate Ma’a Tonga lolotonga ‘a e fe’auhi  Ipu ‘a Mamani 2013 ‘a ia na’e fakahoko ki Pilitānia.

Ko hono faka’ilo foki ‘eni ‘o Semisi Sika ‘a ia ko e Palesiteni ia ‘o e TNRL pea mo Stan Moheloa ‘a ia koe Sea ia ‘o e Poate pehe ki he TNRL mo fokotu’u ke fakahoko ha tu’utu’uni ‘a e Fakamaau’anga ke fakahoko leva ‘a e ngaahi fokotu’u na’e fakahoko ‘i he ‘eke mo e faka’ilo ko’eni ‘e he kau Talatalaaki hange koia ‘oku hā atu ‘i ‘olunga.

‘I he tu’utu’uni ‘a e Tu’i Fakmaau Lahi na’e mahino mei ai ‘oku hoko ‘a e maumau lahi mo e movetevete lahi ‘a e Poate ‘Akapulu Liiki ‘o kau ai mo e ‘Akapulu Liiki ‘i he fonua makatu’unga ‘i he ‘ikai ke malava ke fakahoko lelei ‘e Sika mo Moheloa hona fatongia fakataki pea kau atu kiai mo hono maumau’i ‘o e Konisitūtone ‘a e Poate ‘o ‘ikai toe fakahoko ha fili Lakanga talu mei he ta’u 2013.

‘Oku toe fakaloloma foki ‘a e mahino mai ‘i he ngaahi fakamo’oni na’e ‘ohake ‘i he fakatonutonu ko’eni ‘a hono tali ‘e he Tu’i Fakamaau Lahi na’e fakahoko ‘a hono fakamoleki ta’e fakangofua ‘e he Poate ‘a e Pa’anga ‘a e TNRL kau kiai mo e ‘ikai ke malava ke fakahoko ha fakamatala pa’anga (acquittal) ‘o e pa’anga tokoni ‘a e Pule’anga ‘a ia na’e ‘osi fakahoko ‘a e aleapau ‘e fakahoko mai ‘a e lipooti koia hili pe ‘a e fe’auhi Ipu ‘a Mamani 2013.

‘Oku hā pe foki ‘i he tu’utu’uni ‘a e Fakamaau Lahi na’e ‘i ai ‘a e tohi fakatokanga mei he ‘Ateni Seniale ‘i he ta’u 2013 ki he TNRL ‘o fakatokanga ‘e fakahoko ha fakatonutonu fakalao kapau ‘e ‘ikai ke fakahoko ange ha fakamatala fekau’aki mo e tu’unga na’e fakamoleki kiai ‘a e Pa’anga tokoni ‘a e Pule’anga. ‘I he taimi tatau pe foki na’e toe tali ‘e he Tu’i Fakamaau Lahi mo e ngaahi fakamo’oni ‘i he fakatonutonu ko’eni koe konga si’i pe ‘o e pa’anga tokoni ‘a e Pule’anga na’e ngāue’aki ki he vahe (allowance) ‘a e fanau va’inga pea ko hono toe ‘oku ‘ikai ha fakamatala kiai.

Kaikehe na’e toe hā mahino pe foki ‘i he tu’utu’uni ‘a e Tu’i Fakamaau Lahi ‘a ‘ene tali ‘a e ngaahi fakamo’oni mei he tafa’aki ‘a e kau Talatalaaki ‘o mahino na’e toutou fakahoko ‘a e fakatokanga ki he kau Faka’iloa mei he kau Talatalaaki ka na’e ‘ikai ha tokanga kiai ‘e taha ‘a Palesiteni mo e Sea ‘o e Poate pea kei hokohoko atu pe foki mo hono toho ‘ikai ha tu’utu’uni kiai ‘a e Poate TNRL ‘a e pa’anga ‘a e TNRL mei he ‘akauni ‘i he Pangikē ANZ. Ko e konga foki ‘o e ngaahi pa’anga na’e toho ‘ikai fakamafai’i ‘e he Poate na’e teuteu ia ke foaki ‘e Semisi Sika ki he ngaahi taumu’a kekekehe pe.

Na’e tu’utu’uni ai pe foki ‘e he Tu’i Fakamaau Lahi ‘oku mo’oni ‘a e kau Talatalaaki pea kuo pau leva ke fakahoko leva ‘a e ngaahi me’a ko’eni ‘oku hā atu ‘i lalo;

1.    Ke fakahoko leva hano ‘atita’i ‘a e tu’unga faka-pa’anga ‘a e TNRL mei he ta’u 2012 ki he 2015.

2.    Ke fakahoko leva ha fili Lakanga ‘o fakatatau ki he tu’utu’uni ‘a e Konisitūtone ‘a e Poate mo e Lao.

3.    Ke ‘oua na’a toe ngofua ke ngāue’aki ha pa’anga ‘a e Poate kae ‘oua leva kuo maau malie ha fili lakanga.

‘Oku mahino mai foki ‘e toe hā ‘a e ongo tafa’aki ‘i he ‘aho 20 ‘o Mē ‘i he Fakamaau’anga Lahi ke fakapapau’i ‘a e ngaahi makatu’unga (terms) ‘e fakahoko ‘aki ‘a e ngaahi tu’utu’uni (orders) ‘i ‘olunga pea ‘e hoko eva mei ai ha fakatonutonu ‘a mui ange ‘oka fiema’u.

Ko e ‘isiū mahu’inga heni ko hono fehu’ia ‘o e tu’unga falala’anga ‘o Sika he ‘oku malava mei he hoko atu ko’eni ‘a e fakatonutonu ko’eni ke faka’iloa hia ia ‘o fakatatau mo e ngaahi maumau kuo tali ‘e he tu’utu’uni ‘ a e Tu’i Fakamaau Lahi. Na’e ‘osi ‘oatu foki ‘e he ongoongo ni ‘a hono fehu’ia pe koe hā ‘oku ‘ikai ke fakahoko leva ai ‘e he Palēmia ha ngāue kia Sika ki he’ene tataki kovi ko’eni ‘oku fai ki he ‘Akapulu Liiki ‘i he fonua.

Kuo hoko foki ‘a Sika ko e Minisitā ‘i he Kapineti ‘a e Pule’anga ka ‘oku tu’u fehu’ia lahi ‘aupito pe ‘oku falala’anga koaa ‘a e tokotaha ni lolotonga ia kuo hā mahino mai mei he tu’unga lolotonga ‘o e fakatonutonu ko’eni ‘a e maumau lahi kuo hoko ‘i he TNRL lolotonga ‘a e ‘i he fohe ‘a Semisi Sika.

5 comments

  • Sione A Mokofisi
    Sione A Mokofisi Thursday, 19 May 2016 09:19 Comment Link

    'OKU FIE 'ILO 'E HE KAU MĒMIPA MEI MULI 'A E TU'UNGA FAKA-PA'ANGA 'A E KOLISI TUTUKU LIAHONA-SAINEHĀ...
    1) 'I he Fakatahataha (Re-Union) 'o e 2009, 'aho na'e fai ai 'i BYU-Hawaii, La'ie, 'Oahu, na'a ku fehu'i 'i he fakataha 'a e kau taki 'o kau ki ha fakamatala faka-pa'anga (financial statement), mo e tu'unga 'o e toenga pa'anga (balance) 'a e Kolisi Tutukú.
    2) Na'e tali 'e he taki ko Sione Lōseli ko e toenga pa'anga tohi pangikē ko e $4,000,000 (miliona).
    3) Na'a ku 'eke 'a e fakamatala pa'anga, pea talamai 'e toki tufa e ngaahi tatau 'i Honolulu 'i he 'aho hokomai. Me'a pangō, na'e hala'atā ke tufa mai ia 'i Honolulu.
    4) Na'e fili ai 'a e Palesiteni fo'ou 'o ma'u 'e Semisi Sika 'o a'u mai ki he ta'u kuo 'osi. Ko e ta'u ia 'e ono (6).
    5) 'I he faka-tahataha mai ki Tongá ni 'i he ta'u kuo 'osi (2015), na'e fai e fili lakanga fo'ou ke fetongi 'a Sēmisi Sika.
    6) Na'a ku fanongo ko e toenga pa'anga (balance) 'i he tohi pangikē 'a e Kolisi Tutukú ko e $3,000,000 (miliona). Na'e 'ikai tufa ha fakamatala pa'anga faka-ikiiki.
    7) Fiema'u ha fakaikiiki 'o e tu'unga faka-pa'anga 'o kau ai 'a e pa'anga tokua na'e fakatupu (invest) pe koehã kuo holo ai $1,000,000 (miliona) lolotonga 'a e taki 'a Sēmisi Sika (2010-2016).
    Ko e konga lahi 'o e pa'anga tānaki 'i he ta'u kotoa ko e tolo-pa'anga 'ofa mai 'a e kau Kolisi Tutuku nofo muli. Hili ko ia, ko e Poate 'oku fili pe 'i Tonga, pea 'oku 'ikai ngofua ke kau ha taha mei muli 'i he mēmipa Poaté.

    Report
  • Siua
    Siua Thursday, 19 May 2016 08:44 Comment Link

    Kautama koe taimi ni feinga a Akilisi ia ke fufulu e faihala he'ene tukuakii fakafoituitui e ngaahi Puleanga ki mua ke fai aki ene kemipeini kae tukunoai pe faihala ia o hono Pule'anga. Kuo mooni e lau uluaki to'o e malamala'i'akau ho mata pea ke toki ala atu ki he mata kehe.
    Kaikehe Semisi Sika kuo hili koe kihe me'afua pea ilo kuo ke ma'ama'a. Ka ne ke nofo pe koe hoo fale hemipeka oku moluu. Ka kuo alu o Politikale ke osi ilo pe koe elia ia e kau Ikata'ane koe 'atunga ena 'e 'au'au koe he aho moe po!

    Report
  • Matangi Tokelau
    Matangi Tokelau Thursday, 19 May 2016 01:47 Comment Link

    Malie e lahi e ongoongo ni ketau 'ilo e tafa'aki 'e taha 'o e kakai 'oku nau tu'uaki e faitotonu 'a e Paati 'Otuanga'ofa. Hange koe lau sai ketau 'ilo...

    Report
  • sione
    sione Tuesday, 17 May 2016 05:06 Comment Link

    Ko fe'ia ko aa 'etau kaveinga ngaaue ke fufulu e faihala? Te tau fai filifilimaanako nai hono fufulu e faihala he ko eni kuo mahino lelei na'e ngaaue'aki e pa'anga e 2 kilu tupu mei he pule'anga?

    Report
  • fieilo
    fieilo Monday, 16 May 2016 22:16 Comment Link

    Kapau na'e pehee pe he te'eki ai ke Minisita, pea huanoa ha taimi 'e hopo pafua hifo ai he fu'u loto kulo ngako. Kuo hu atu a Lavu kae hu mai a Sika pea mo'oni e lau, 'ange'ange e tama he ta'ahine. Kou sioloto atu ki ha'ane foutou fakamo'oni sieke he pa'anga langa ki he Sipoti 2019, pea kuo lele hake e ninimo ia. Kuo tekeutua mai e honge tangata lelei mo falala'anga he ki'i Pule'anga 'o Pohiva, pea ko hono iku'anga ee koe nonoa'ia pe moe katuni ta'ekala.

    Report

Leave a comment

Make sure you enter all the required information, indicated by an asterisk (*). HTML code is not allowed.

back to top