Mo'ua pa'anga tahamano (10000) Lord Tu'ilakepa hao pe 'ikai to'o mo e hingoa mo e lakanga Featured
Na’e hilifaki ‘ e he Fakamaau Lahi Fakamaau Cato ‘a e tautea ‘o ‘Eiki Nopele Tu’ilakepa ‘i he ‘aho ni ‘aho Tu’apulelulu ko hono 5 ‘o Fepueli kene totongi ‘a e pa’anga ‘e tahamano ki he tikite ‘e nima ‘a ia na’e mo’ua kiai ‘o fekau’aki kotoa mo hono tauhi mo ma’u ‘a e me’atau mo e mahafu ta’e fakalao. Na’e tu’utu’uni ai ‘e he Fakamaau Cato ke totongi ‘e Nopele Tu’ilakepa ‘a e pa’anga ‘e 2000 ki he tikite ‘e taha ‘a ia koe tikite fakakatoa ‘e nima na’e mo’ua kiai ‘o fe’unga katoa mo e pa’anga ‘e tahamano.
‘Oku fiema’u foki ke fakahoko ‘a e totongi ko’eni ‘i loto ‘i he uike ‘e ua pea ka ‘ikai leva ‘e hilifaki ‘a e tautea ngaue popula fe’unga mo e mahina ‘e ono. Ko e hopo ko’eni na’e talu hono kamata mai mei he konga kimu’a ‘o e ta’u 2011 ‘a ia koe mei lava ‘eni ‘a e ta’u ‘e nima pea toki fakahoko ‘a e aofangatuku ‘a e Fakamaau. Ko e tautea taupotu ki he fa’ahinga hia ko ‘eni koe ngaue popula ta’u ‘e 5 pea ‘oku tu’utu’uni pe foki ‘e he lao ‘oku malava ke kau ki ai moha ngaue ma’a e komiuniti.
Na’e makatu’unga ‘a e tautea ko’eni kuo hilifaki ‘i he taukapo ‘a e Fakafofonga Lao ‘a e faka’iloa William Clive Edwards Sr. pehe ki he ‘atakai ‘o e hopo ni ‘o kau kiai ‘a e ngaahi fatongia, tu’unga, mo e fengaue’aki ‘a e faka’iloa mo e fonua, siasi, pule’anga pehe ki he famili. ‘Oku ‘ikai foki ha lekooti faihia ‘o e ‘Eiki Nopele pea na’e kaunga lahi pe foki ‘eni ki hono fakakaukau’i ‘o e tautea ni fakatatau ki he fakamatala ‘a William Clive Edwards Sr.
‘Oku toe ha mahino foki mei he tu’utu’uni ko’eni ‘oku ‘ikai hano kaunga ki he fatongia lolotonga mo e Hingoa Nopele Tukufakaholo ‘o e faka’iloa ‘a ia ‘oku ‘ikai ke mole pe to’o meiate ia hange koe lau ‘a Edwards. Ko hono toloi mai ‘e ni ‘a e hilifaki tautea ‘o e hopo ni mei he ‘aho 23 ‘o Sanuali 2015. Na’e fakafofonga’i ‘a e ‘Eiki Nopele ‘e William Clive Edwards Sr. pea ‘Aminiasi Kefu ma’a e Kalauni.
 Lord Tu'ilakepa hao pe 'ikai to'o mo e hingoa mo e lakanga "Pin It")