Ta'efiemalie Fakamaau Lahi Justice Cato ki hono toutou toloi hopo 'a e 'Eiki Nopele Tu'iha'ateiho
Na’e toe toloi ki he ‘aho 27 ‘o Fepueli ‘a e hopo ‘a e ‘Eiki Nopele Tu’i Ha’ateiho fekau’aki mo hano faka’ilo ia ki hano tauhi ta’efakalao ha me’atau ‘i Ha’ateiho ‘i he ta’u 2010. Na’e ‘amanaki foki ke fakahoko he ‘aho ni ‘a e malanga fakahu ki ha tu’unga ‘o ha tautea (sentencing submission) hili hano kole ‘e he loea ‘a ‘Eiki Nopele Tu’i Ha’ateiho ‘i Novema 2014.
Na’e toe kole foki ‘e he loea ‘a e ‘Eiki Nopele Kahu Afeaki ‘i he ‘aho ni Monite 19 Sanuali ke toloi ‘eni ki he ‘aho 27 ‘o Fepueli. Na’e fakaha ai ‘e he Fakamaau Lahi Justice Cato ‘e ‘ikai malava ke tolotoloi ai pe ‘a e hopo ko’eni ke ta’engata pea ne fakaha mahino ai ko hono toloi faka’osi pe ‘eni.
Ko ‘Eiki Nopele Tu’iha’ateiho ko e Fakafofonga Nopele ia ‘o e Vahefonua Ha’apai ki he Fale Alea ‘o Tonga pea na’a ne hoko koe Tokoni Sea ‘o e Fale Alea ‘o Tonga he teemi faka Fale Alea 2010-2014.
