Fakata’e’aonga’i Fakamaau’anga Lahi tu’utu’uni Pule’anga ke Fakamalōlō’i ‘a Tuna Fielakepa mo‘Eseta Fusitu’a Featured
Lady 'Eseta Fusitu'a, Hon. Poasi Tei, H.E.Dr.Kazuchika Hamuro ('Amipasitoa Maloloo Siapani ki Tonga) mo 'Ahongalu Fusimalohi
Nuku’alofa, 30 Ma’asi 2016. Kuo tu’utu’uni ‘e he Tu’i Fakamaau Lahi Owen Paulsen ‘i he Fakamaau’anga Lahi ‘aneafi 29 ‘o Ma’asi 2016 ke fakata’e’aonga’i ‘a e tu’utu’uni ‘a e Kapineti ke fakamalōlō’i ‘a Lady ‘Eseta Fustu’a mo Lady Tuna Fielakepa mei hona lakanga ko e memipa ‘i he Poate ‘a e Kau Talēkita ‘o e Komisoni Fakamafolalea ‘a Tonga.
Ko e tu’utu’uni ‘eni makatu’unga mei he tu’utu’uni ‘a e Kapineti ‘i he mahina ko ‘Okatopa 2015 ‘o fakafou mai ‘i he Minisitā ki he Ngaahi Pisinisi ‘a e Pule’anga Poasi Tei ke fakamalōlō’i ‘a e ongo fefine ni koe ‘ikai kena fie fakafisi mei hona lakanga ‘o fakatatau ki he fokotu’u mei he Potungāue ki he Ngaahi Pisinisi ‘a e Pule’anga.
‘Oku mahino foki ko hono fokotu’u ke fakatokosi’i mo fokotu’utu’u fo’ou ‘a e ngaahi Poate ‘a e Pule’anga koe konga ia ‘o e fokotu’utu’u ‘a e Palēmia mo e Kapineti ’o hoko ai ‘a e ngaahi tu’utu’uni ko’eni ‘a ia na’e ‘ikai fakalao ‘o hangē koia kuo fakamahino mei he Fakamaau’anga Lahi ‘a e fonua.
‘Oku mahino mai foki kuopau ke totongi ‘e he Pule’anga ‘a e ngaahi fakamole ki he hopo ni. Na’e fakafofonga’i ‘e William Edwards Jr. ‘a e ongo Talatalaaki pea ko e ‘ateni Seniale Le’ole’o ma’a e tafa’aki ‘a e Pule’anga.
