Fakafoki mai ki Tonga hili pe ‘ene ngāue pōpula Featured
Motekiai Taufahema 'i hono puke 'e ke Kau Polisi Niusauele 'i he 2002
Nuku’alofa, 28 Ma’asi 2015. Kuo fakafoki mai ki Tonga ni ‘a e matāpule ko Motekiai Taufahema hili hia ha’ane ngāue pōpula fe’unga mo e ta’u ‘e 11 ki he’ene kaunga kau ki hono fakapoongi ‘a e ‘Ofisa Polisi ‘i Niusaulele ko Glenn McEnallay ‘i he ta’u 2002.
‘Oku mahino mai foki mei he fakanatala mei he kau ma’u mafai ‘e fakafoki mai mo hono tokoua ko John Taufahema ‘a mui ange hili ha’ane ‘atā mei he ‘api pōpula. Ko e ngāue popula foki ‘eni ‘a e ongo tautehina ni ki he’ena kaunga fai ‘a hono fakapoongi ‘o e ‘Ofisa Polisi ko’eni ‘i he ta’u ‘e 14 kuo maliu atu lolotonga ono faka’ata kinaua ki tu’a mei he taha ‘o e ngaahi ‘api pōpula ‘i Niu Sauele.
Ko e ongo tautehina foki ko ‘eni na’e ta’ofi kinautolu fakataha mo e matāpule Tonga pe ko Sione Penisini ‘e he ‘Ofisa Polisi ko’eni ko McEnallay ‘i he ta’u 2002 lolotonga ko’eni ‘oku faka’atā mai kinau mei he ‘api pōpula ki he hia natula tatau na’a na fakahoko ki mu’a.
Ko hono ta’ofi ko’eni ‘a e kau tangata Tonga ni ‘oku ‘iate kinautolu ‘a e me’afana kaiha’a ‘e 4 fakataha mo e motokā na’a nau heka atu ai ‘a ia ko e motokā kaiha’a moia pea hoko ai hono fana’i ‘e Sione Penisini tu’o tolu ‘a e Ofisa Polisi ko’eni ‘o tau ‘a e fana ‘e taha ‘i hono ‘ulu pea ua ki hono fatafata.
‘Oku ‘i ai ‘a e hoaha’a lahi ‘a e fonua ki hono fakafoki mai ko’eni ‘etau fanau kuo nau fakahoko ‘a e ngaahi faihia lalahi pehe ni ‘i muli pea ‘oku tu’u fehu’ia ai ‘a e tu’unga malu ‘o e fonua. ‘Oku ki’i lahilahi ‘a e palopalema ‘oku fakahoko ‘ehe fanau Tonga koeni kuo fakafoki mai pea ‘oku fai e tokanga mavahe kiai ‘a e fonua.
