‘Ikai toe Tangi ‘a Lavulavu ki he Fakamaau’anga Tangi Featured
Nuku’alofa, 12 Ma’asi 2016. Kuo mahino mai mei he Fakamaau’anga Lahi ‘oku te’eki ke fakahū ange ha tangi ‘a ‘Etuate Lavulavu fekau’aki mo e tu’utu’uni ‘a e Tu’i Fakamaau Lahi fekau’aki mo e hopo Fili Fale Alea (Election Petition) ‘i he vaha’a ‘o Lavulavu mo Dr. Viliami Uasike Latu ‘i he ‘aho 29 ‘o Sanuali 2016.
Na’e tu’utu’uni foki ‘a e Tu’i Fakamaau Lahi Owen Paulsen ‘o fakata’e’aonga’i ‘a e hoko ‘a ‘Etuate Sungalu Lavulavu ko e Fakfofonga Fale Alea 'o e Vahenga Fili Vava’u 16 makatu’unga ‘i he’ene maumau’i fakafou 'i he totongi fakafufuu mo e laka hake 'a e fakamole 'i he pa'anga 'e 10,000 ‘a e Lao Fili Fale Alea 1989.
Na’e tukuange foki ‘e he Tu’i Fakamaau Lahi ‘i he’ene tu’utu’uni peesi ‘e 95 ‘i he hopo ni 'i he 'aho 29 'o Fepueli 2016 ‘a e ‘aho ‘e 40 kia Lavulavu ke fakahoko ai ha’a ne tangi ‘a ia na’e ngata ia mei he ‘aho Pulelulu 9 ‘o Ma’asi 2016. ‘I he ‘au mai ki he faka’osinga ‘o e uike ni na’e mahino mai ‘oku te’eki ke ma’u ‘e he Fakamaau’anga ha tangi ‘a Lavulavu fekau’aki mo e tu’utu’uni ‘a e Tu’i Fakamaau Lahi ‘i he hopo ni.
‘I he taimi tatau fakatatau ki he ongoongo 'a e Letio Tonga kuo ma’u ‘e he Fakamaau’anga Lahi ‘a e tangi ‘a Mateni Tapueluleu fekau’aki moe tu’utu’uni ‘a e Tu’i Fakamaau Lahi Owen Paulsen ‘i he ‘aho Falaite ko hono 11 ‘o Tisema 2015 na’e ta’efakalao hono fokotu’u ‘o Mateni Tapueluleu kene hoko ko e Kanititeiti Fili Fale Alea ki he Fili Fale Alea ‘o e ‘aho 27 Novema 2014 ‘i he Vahenga Fili Tongatapu 4. Na’e mole foki heni ‘a e sea ‘o Tapueluelu ‘i he Fale Alea pea ko’ene tangi ‘eni fekau’aki mo e tu’utu’uni koia.
‘I he’ene pehe leva ‘e tu’ulahoko ai pe ‘a e Fili Si’i ki he Sea Fakafofonga Fale Alea ‘o e Vahenga Fili Vava’u 16 ‘a ia ‘e fakahoko ia ki he ‘aho 26 ‘o Mē 2016 fakatatau ki he me’a ‘a ‘Eiki Sea ‘o e Fale Alea ‘o Tonga Lord Tu'ivakano.
