“ 'Oku taki 'a e mitia he taukave 'oku 2 ma'u pe 'a e tafa'aki 'o e 'uhinga ha me'a 'a ia ko e 'uluaki ko e tafa'aki 'o e poupou mo e ua ko e tafa'aki 'o e ta'epoupou.
'Oku hoko heni 'a e maumau lahi he 'oku 'ikai ke ne talamai 'a e mo'oni 'o e 'uhinga ha me'a 'a ia ko e tafa'aki ia hono tolu mo e tafa'aki ma'uhinga taha ka e 'ikai ko e tafa'aki 'uluaki 'o e poupou mo e tafa'aki ua 'o e ta'epoupou.
'Oku malava pe ke hoko 'a e tafa'aki 'uluaki 'o e poupou 'o makatu'unga he tafa'aki tolu 'o e mo'oni 'a e 'uhinga ha me'a ka e hoko 'a e tafa'aki ua 'o e ta'epoupou 'o tatau pe 'oku mo'oni pe loi 'a e 'uhinga ha me'a.
Na'e 'asi lelei 'eni he ngaahi keisi ta'efakalao 'a 'Etuate Lavulavu he fetukuaki 'a e tafaa'aki 'uluaki 'o e poupou mo e tafa'aki ua 'o e ta'epopou pea toki hu mai 'a e lao, fakamaau'anga mo e fakamaau 'o fakamahino 'a e tafa'aki tolu 'o e mo'oni 'o e 'uhinga ha me'a.
Na'e holofa fakatouloua 'a e ongo tafa'aki 'uluaki mo e ua ka e ikuna kaafakafa 'a e tafaa'aki tolu 'o e mo'oni 'a e 'uhinga ha me'a: 'o ma'u kotoa ai 'ene halaia he ta'efakalao 'ene foungafai he funga 'o e loi, kaka mo e siokita, 'o tatau pe he'ene 'a mo 'ene mohe, 'a ia 'oku misi pe 'oku ne lohiaki mo kaka'i 'a e kakai he'ene ta'e'ofa mo e sio pe ma'ana.
'Oku hoko 'a e tafa'aki 'uluaki 'o e poupou ki he tafa'aki tolu 'o e mo'oni 'a e 'uhinga ha me'a 'o fai'aki 'a e 'ilo, poto, mahino mo e maama ka e hoko 'a e ta'epoupou ki he tafa'aki tolu 'o e mo'oni 'a e 'uhinga ha me'a 'oku fai'aki 'a e ta'e'ilo, ta'epoto/vale, ta'emahino mo e fakapo'uli PE loi, kaka moe siokita.
'Oku 'i ai 'a e me'a 'oku 'asi tekeutua mai mei he poupou 'a e fa'ahinga tokosi'i ko 'eni ki he ta'efakalao 'o e ngaue mo e taki 'a 'Akilisi Pohiva mo 'ene Kapineti mo hono Pule'anga mo e ta'epoupou ki he mo'oni fakalao 'oku tefito ai 'a e lelei fakalukufua 'o e fonua.
Ka 'oku 'ikai pe ko 'enau fai he ta'e'ilo, ta'epoto/vale, ta'emahino mo e fakapo'uli ko e fai he loi, kaka moe siokita pe fakatouloua he ta'e'ilo, ta'epoto/vale, ta'emahino mo e fakapo'uli mo e loi, kaka moe siokita. Ka ko e ha koa ho'ona kehekehe ko e tupu kotoa pe mei he tefito 'e taha! ”