Tu’uaki Fakatau Atu Poate Taulanga MV Pulupaki & MV ‘Alaimoana Featured
MV Pulupaki 'i he Uafu Kuini Sālote
Nuku’alofa, 29 Mē, 2015. ‘Oku lolotonga hā foki ‘i he ngaahi tu’uaki ‘i he mītia ‘o kau ai pe foki moe uepisaiti ‘a e Poate Taulanga ‘a Tonga ‘a hono tu’uaki fakatau atu ‘e he Poate Taulanga (Ports Authority) ‘a e ongo vaka uta pasese koe Pulupaki kae pehē ki he ‘Alaimoana.
Ko e Pulupaki ‘oku ‘ikai sola kiha taha koe vaka ‘eni ‘o e Kautaha Uata Shipping Line ‘a ‘Uliti Uata pea ‘oku toe kau foki mo e MV Tautahi pehē ki he MV ‘Ikale ‘i hono tu’uaki fakatau atu ko’eni. Ko e MV ‘Alaimoana leva ko e vaka ia ‘o e Kautaha Tōfā Ramsay ‘a ia ‘oku fakalele ‘e Nunia Ramanlal.
Ko e ongoongo fakaloloma ‘eni ‘o makatu’unga ‘i he hisitōlia fua fatongia ‘o e ongo kautaha ko'eni ma’ae fonua pea koe ta’u lahi ‘a e fakahoko fatongia ‘a e ongo kautaha ko ‘eni ki hono sevesi ‘o e fefolau’aki ‘i he vaha’a ‘o e ngaahi ‘otu motu ‘o Tonga ni.
‘Oku mahino pe foki ko hono tu’uaki fakatau ko’eni ‘o e ngaahi vaka ni ‘oku lolotonga puke fakalao kinautolu ‘e he Poate Taulanga ‘o makatu’unga ia ‘i he tu’utu’uni faka Fakamaau’anga Fika CV.89 ‘o e 2014; CV 09 ‘o e 2014 mo e CV 77 ‘o e 2013.
‘Oku mahino pē foki koe makatu’unga ‘eni ‘i he ngaahi mo’ua ‘o e Kautaha Uata Shipping Line pehē ki he Kautaha ‘a Tōfā Ramsay ki he Poate Taulanga pea koe totonu fakalao pe foki ‘eni ia ‘a e Poate ke fakahoko ‘a hono fakatau atu ‘a e ngaahi vaka ni ke ma’u mai ai ‘enau fakamole.
Lolotonga ‘eni ‘oku fai e manatu ‘ofa ki he ongo mo’unga’i tangata ko’eni ‘Uliti Uata pehē kia Tōfā Ramsay kuo ne pekia ka koe ongo Fakafofonga Fale Alea malōlō ‘o e ‘Otu Ha’apai. 'Oku 'ikai tanu 'eha taha koe ngāue mateaki na’e fakahoko 'e he ongo tangata ni ma’ae folau tahi mo hono fakahoko ‘a e ngaahi sevesi na’e ‘ikai lava ‘e he Pule’anga 'o fakahoko ma'ae kakai ‘o e ‘otu motu 'o Tonga ni. 'Oku fai e salute ki he ongo tangata ni neongo 'a e fakaevaha faka pisinisi 'oku hoko ko'eni.
Kuo ma'u 'a e fakamatala falala'anga mei he loea 'a e taha 'o e ongo kautaha ni 'oku fai pe 'a e feinga na'a lava 'o haofaki 'a e teuaki fakatau ko'eni ka 'oku 'ikai mahino hono ola.
'E tāpuni foki 'a e tohi talamahu'inga (tender) ki hono fakatau atu 'o e ngaahi vaka ni ki he taimi 4:00 Efiafi 'Aho 30 'o Sune 2015.
