‘Ohofi ta’emalōlō ‘e he Pule’anga ‘a e kau Pisinisi ‘o e fonua ^Featured

Kuo ma’u ‘e he ongoongo ni ‘a e tatau ‘o e ngaahi tohi ‘a e CEO ‘a e Potungāue Leipa Edgar Cocker ki he kau pisinisi lalahi ‘i Tonga ni ‘o fakamanamana’i kinautolu ‘e tapuni ‘enau ngaahi pisinisi kapau ‘e ‘ikai kenau fakakakato ange ‘a e ngaahi fiema’u ‘a e Potungāue mo e Pule’anga.

‘Oku mahino pe ‘a e lao ia mo e ngaahi tu’utu’uni ‘a e Pule’anga mo e fiema’u ke muimui kiai ‘a e kau pisinisi pea ‘oku totonu ke fakahoko ‘eni ka ‘oku ho’ata mai mei he ‘otu tohi ko’eni ‘a e ‘asenita ngāue ‘a e Pule’anga pea mo hono taketi’i ‘a e kau pisnisi ‘o e fonua kae tautautefito ki he kau Siaina.

Ko e tokolahi foki ‘a e kau pisinisi Siaina mo muli foki ia kuo nau ‘osi liliu kakai pea kuo nau hoko koe kau tangata’i fonua Tonga pea ‘oku nau ma’u mo e ngaahi totonu hange koe kakai Tonga totonu.

‘I ha fakatalanoa ‘a e ongoongo ni ki he tokolahi ‘o e kau pisinisi ko’eni kuo taketi’i ‘oku nau fu’u ta’efiemālie ki he taumu’a ngāue ko’eni ‘a e Pule’anga pea ‘oku nau fehu’ia pe kuo liliu koaa ‘a e lao ki he ngaahi pisinisi pe ‘ikai he koe ngaahi me’a ‘oku fehu’i mai ‘e he ngaahi tohi ‘a e CEO ‘oku kauhala kehekehe ia mo e lao mo e founga ngāue anga maheni ‘a e Pule’anga ‘a ia kuo fakapaasi ‘i he ngaahi Potungāue pea na’a nau muimui kiai.

‘I he fakamatala ‘a e taha ‘o e kau pisinisi ‘iloa ‘i Tonga ni na’a ne pehe ai ‘oku faka’ohovale ‘eni pea koe hū mai ko’eni ‘a e CEO fo’ou ‘a e Potungāue Leipa Edgar Cocker ‘oku ta’efakafiemalie lahi he ‘oku hange ‘eni ia ‘oku ne taketi’i ‘e ia ke tamate’i ‘a e ngaahi pisinisi ‘i he fonua ni.

‘I he lau ‘a e taha ‘o e kau pisinisi na’a ne pehe ai ‘oku fepaki (conflict of interest) ‘a e ngāue ‘a e CEO pea ‘ikai fakapolofesinale he ko e tangata pisinisi ‘a Edgar Cocker pea na’a nau fe’auhi ‘i he mala’e ‘o e pisinisi ka ko’eni kuo hū ia ‘o CEO pea ne feinga ia ke tukuhifo kinautolu.

‘Oku nau toe fehu’ia foki pe ‘oku ne fakahoko ‘a e me’a tatau ki he’ene ngaahi pisinisi pe ‘ikai. ‘Ikai ngata ai ka ‘oku hoko ‘ene ngaahi tohi ‘o hange ia koia ‘oku CEO he katoa ‘a e ngaahi Potungāue ‘a e Pule’anga pea ‘oku ki’i fihi ‘eni kiate kinautolu.

‘I he lau ‘a e tokolahi ‘o e kau pisinisi ‘oku nau ngāue ke fakahoko ha fakatonutonu fakalao fekau’aki mo e ngaahi tohi mo hono tukuaki’i kinautolu ‘e he Pule’anga ‘o fakafou mai ‘i he CEO ‘a e Potungāue Leipa.

‘Oku tui ‘a e ni’ihi ia ‘o e kau pisinisi kapau ‘oku nau maumau’i ‘a e lao pea ‘oku totonu pe ‘a e Pule’anga ia ka ‘oku ho’ata mai ‘oku ‘i ai ‘a e taumu’a kehe pea ‘oku toe ‘asi mai ‘oku ‘i ai ‘a e taumu’a ia ‘a e Pule’anga ke fakalele pisinisi ‘o fe’auhi mo e sekitoa taautaha.

Na’e tuku atu foki ‘e he ongoongo ni ‘a e feinga ‘a e Pule’anga ke fakatau ‘a e Hotele Little India ‘i he Hala Vuna ‘i Sopu pea na’e tohi ai ‘a e CEO Leipa ki he tokotaha ‘a’ana ‘a e Hotele Anita Singh ‘o fakamahino ‘a e pau ‘e fakatau ‘e he Pule’anga ‘a e Hotele.

‘Oku mahino foki na’e toe fakataha ‘a e Palemia pea mo e tokotaha ‘a’ana ‘a e Hotele fekau’aki mo e fakatau ko’eni ‘i he mahina ko Novema 2017.

‘Oku fu’u mahu’inga ‘a e kaveinga ni he koe tokolahi taha ‘o e kau pisnisi ko’eni ‘oku nau totongi tukuhau lahi pea ‘oku ma’u mei ai ‘a e pa’anga ‘oku fakalele ‘aki ‘a e fonua he ngaahi ‘aho ni.

‘Oku ‘ikai ke fihi pe faingata’a ke mahino’i ‘a e mo’oni koia ‘e hoko ‘a hono fakafaingata’a’ia’i ‘a e kau pisinisi mo e feinga ‘a e Pule’anga ke fe’auhi mo kinautolu ke fakatu’utamaki ki he ‘ikonomika ‘o e fonua pea ‘e fua hono ola ‘e he kakai ‘o e fonua.

Kuo fakaha ‘e he taha ‘o e kau pisinisi lalahi ‘i he fonua ni ‘oku hoko ‘a e liliu fakafokifa ‘i he ngaahi polisii ‘a e Pule’anga fekau’aki mo e pisinisi kenau fakakaukau pe tenau kei nofo ‘i Tonga ni pe ‘ikai.

Kuo ma’u foki mo e fakamatala ia kuo fakahū fakavavevave hake ki he Fale Alea ‘a e Lao Fakaangaanga ki he kau Pisinisi Muli (Foreign Investment) ‘a ia ‘oku hā mai koe fakamo’oni ki he kaveinga ni ka ‘oku mahuinga foki ke ‘uluaki ‘ave ke fai mai ha lau kiai ‘a e kakai ‘o e fonua.