Hopoki ‘e He’ene 'Afio vaka ‘o e Fonua MV Tongiaki Featured
Hopoki ‘e He’ene 'Afio Tupou VI MV Tongiaki
15 Sanuali, 2017. Na’e hopoki ‘e he Tama Tu’i Tupou VI ‘i he ‘aho Falaite 12 ‘o Sanuali ‘a e vaka fo’ou ‘o e fonua ‘a ia na’a ne fakahuafa ko e MV Tongiaki.
Ko e vaka foki ko’eni na’e fe’unga hono mahu’inga mo e pa’anga ‘Amelika ‘e 3 Miliona pea koe vaka ‘alaminiume fō ua’eni ‘a ia ‘oku fakataumu’a ke ngāue’aki ki he ‘otu motu ‘i Tokelau pea kau kiai mo Ha’amoa mo Fisi.
Ko e vaka ni na’e fakatau mai ia mei Singapoa pea ‘oku mita ‘e 33 hono lōlōa pea ‘oku fakanaunau kakato, ‘ea konitisioni pea ‘oku malava kene uta ‘a e kau pasese ‘e toko 200 ‘o kau ai moe uta.
‘I he lea ‘a e Sea ‘o e Poate ‘a e FISA (Friendly Island Shipping Agency ) Stephen Edwards na’a ne fakahā ai ‘oku fakataumu’a hono ‘omai ‘o e vaka ke fakalakalaka ki mu’a ‘a e fēfolau’aki ‘i he fonua.
Na’a ne toe pehe foki na’e nō mai ‘e he Pule’anga ‘a e vaka tatau he ta’u kuo maliu atu pea na’e lauafe ‘a hono totongi ki he ‘aho. ‘E tokoni ‘a e vaka ki he takimamata he ‘e malava kene toe folau ki Fisi mo Ha’amoa hange koe lau ‘a Edwards.
‘Oku malava foki ‘a e vaka ni kene folau ‘i he mailetahi ‘e 31 ki he houa pea ‘oku lau houa pe pea tu’uta ki Vava’u mo Ha’apai.
Na’e fakahoko foki ‘e he MV Tongiaki ‘ene fuofua folau ki Vava’u ‘i he ‘aho Tokonaki 13 ‘o Sanuali ‘a ia koe Tokonaki ia ‘o e uike kuo ‘osi.
