Toe ‘ilonga mai honge suka Featured
28 Ma’asi, 2017. Kuo toe ‘ilonga mai ‘a e kamata ke ‘asi ‘a e honge suka ‘i he fonua. ‘Oku hoko foki ‘eni ke tokanga lahi ‘a e Pule’anga ke ta’ofi hono hikihiki ‘e he ngaahi falekoloa ‘a e totongi ‘o e suka.
Kuo toe fakatokanga foki ‘a e va’a Tokangaekina ‘o e Konisiuma (Consumer Affairs) ‘a e Potungaue Leipa ke lipooti ange kapau ‘oku hikihiki ‘a e totongi ‘o e suka.
‘Oku mahu’inga foki ‘a e fakatokanga mei he va’a konisiuma ‘a e Leipa he ‘oku kamata ‘asi hono hiki ‘o e totongi ‘o e suka ‘o a’u pe ki he peseti ‘e 20 % hono hiki.
‘Oku tupu foki ‘a e honge suka koe ‘ikai ke taimi totonu ‘a e taimi tepile tau mai ‘a e ngaahi vaka uta koloa pea na’e ‘osi hoko foki ki mu’a.
Na’e hoko foki ‘a e honge suka tatau he ta’u kuo ‘osi pea na’e fu’u fakavalevale hono hiki ‘o e totongi ‘o e suka ‘i he ngaahi falekoloa.
