Alea fengaue’aki ‘a e Kautaha Tonga Airways Limited mo Pita Taufatofua Featured
Hema ki Mata'u: Paula Sitapa, Samiu Vaipulu (Sea TAL), Fa'asolo, Pita Taufatofua, David Lavulo Edwards mo Samuela Folaumoetu'i
20 September, 2016. Kuo kamata lalanga ha fengaue’aki vaofi 'i he vaha’a ‘o e kautaha vakapuna fo’ou ko eTonga Airways Limited mo e tamasi’i to’o fuka ‘iloa ‘a Tonga ‘i Rio Pita Taufatofua. ki hano tu’uaki ‘a e kautaha ni.
Ko hono fakaha ia ‘e he sea ‘o e kautaha ni Samiu Kuita Vaipulu ki he ongoongo ni hili ha fakataha moha dinner 'a e Kautaha mo Taufatofua.
Na’e fakaafe’i ‘e Vaipulu mo e Tonga Airways Limited ‘a Taufatofua ki ha fakataha moha dinner mo e kau taki ‘o e kautaha ni pea fakahoko ai ‘a e alelea koeni.
‘I he fakamatala ‘a Vaipulu ‘oku kamata ke fakahoko ‘a e fepuna’aki ‘a e kautaha Tonga Airways Limited 'i he faka’osinga ‘o e ta’u pea ‘oku nau fie ngaue’aki ‘a Taufatofua ki hono tu’uaki ‘a e kautaha ‘i Hongkong pea mo Siaina Lahi he konga ia 'o e maketi 'oku taketi'i 'ehe kautaha.
‘Oku kau heni ‘a hono tu’uaki ‘o e takimamata, sipoti, to’utupu mo e ngaahi fakalakalaka kehe 'o taumu'a ki ha fakalakalaka ma'a e fonua fakalukufua.
‘I he hoko atu ‘a Vaipulu na’a ne fakaha ‘oku mahino ko e taha ‘o e vaivai’anga ‘o e kau atu ‘a Tonga ki he ‘Olimipiki ko e ‘ikai ha naunau fe’unga ke fakahoko’aki hono teuteu'i ‘a e fanau pea ‘oku ‘amanaki ke fakahoko ha talanoa kiai mo ‘enau kau investors he kaha’u vave mai.
