Fuofua folau Kautaha Matson Shipping mei Tonga ki ‘Amelika mo Hawaii Featured
L-R Vic Angoco (Matson Vice President), Sue Gardine (Kingdom Shipping Ltd), Michael Jones (Matson Strategic Development Manager), and Gerry Elbourne, Queen Salote Wharf, Nuku’alofa, 23 August 2016. (Photo: Caroline Manu Moli/Matangitonga)
25 'Akosi, 2016. Na’e hopoki ‘i he efiafi Tūsite 23 ‘Aokosi ‘a e fuofua folau fakahangatonu ‘a e vaka ‘a e kautaha Matison Shipping mei Hawaii mo ‘Amelika ki Tonga ni. Na’e me’a foki ‘i he ouau ko’eni ‘a e Tama Pilinisi Kalauni Tupouto’a pehe ki he Ta’ahne Pilinisesi Sinaitakala Tuku’aho.
Ko hono fakaava foki ‘eni ‘a e halangavaka fakahangatonu mei Hawaii mo ‘Amelika Lahi ki Tonga ni pea ko e ongoongo fakafiefia ‘eni ki he kakai ‘o e fonua kae pehe ki he kau ngoue, kau toutai pehe ki he kau pisinisi ‘o e fonua.
Na’e ‘i Tonga ni foki ‘a e tagata ‘Olopeleki tutuku koia ko Micheal Jones ko e Pule Fakalakalaka ia ‘a e Kautaha ni (Matson Strategic Development Manager) pea na’a ne vikia ‘a e fakalakalaka ‘a e Kautaha ni mo ‘ene falala’anga ‘a ia ‘oku hā pe he ngaahi talanoa lelei mei he kakai ‘oku nau ngāue’aki ‘a e kautaha ni.
Na’e kau mai foki moe Tokoni Palesisteni ‘a e Kautaha Vic Angoco ki he polokalama ni. Ko e Kautaha Matson foki na’e kamata mai hono fakafofonga’i ‘i Tonga ni ‘e he Royco pea ‘oku fakafofonga’i foki ‘e he Royco mo e Kautaha vaka ‘e taha ‘a ia ‘oku nau fe’auhi mo e Matson pea kuo pau ai ke kumi honau fakafofonga fo’ou ‘i Tonga ni fakatatau ki he lau ‘a Anogco.
‘Oku fakafofonga’i foki ‘a e Matson ‘e honau fakafofonga fo’ou ‘i Tonga ni ‘e he Kautaha Kingdom Shipping Limited ‘a ia ‘oku pule ai ‘a Sue Gardiner.
